BJP te rawn lengin min sawm, min sawm nawn tawh ngai lo : Lal Thanhawla

Vawiin Zirtawpni September 21, 2018 hian Congress Party chuan Lal Thanhawla Auditorium-ah Political Session hun hmangin  Lal Thanhawla, Chief Minister leh MPCC President ni bawk chuan thu a sawi a. MPCC Vice President a ruat thar C.L. Ruala, MP (LS) , MPCC Disciplinary Action Committee Chairman C.Lalpianthanga te’n an party member kalkhawmte hmaah thusawina an nei.

ZORAM TODAY: Chief Minister Lal Thanhawla chuan Congress Party hi chunglamin Sorkar leh turin min buatsaih mek a, tunlai kan boruakah party dangte hi phur hle turah ka ngai a, kan party hi kan phur hle zawk a ni tiin, ” Khawvel kalphungah chuan Congress Bhavan te pawh boruak dai ruih a, thawl taka kan awm ka ring a, nimahsela, kan party in harhtharna kan chan phah a, Sorkar leh tura buatsaih ngei chu kan lo ni.” a ti bawk.

Party dangin an party a lut tura an sawm ṭhin thu sawiin Hawla chuan, ” BJP te an rawn lengin min sawm a, kei chu Congress ka ni a, Congress-in ka thi dawn ka ti a, min sawm nawn tawh ngai lo,” a ti bawk.

MPCC Vice President a ruat thar tak C.L. Ruala pawhin thusawiin politics-ah chawlh ve tawh a tum thu sawi pahin a chanvo chelh thar chungchangah , “Mawhphurhna min pe thar leh a, he mawhphurhna min pek hi theihtawp chhuaha thawh ka tum dawn a ni,” a ti.

MPCC Disciplinary Action Committee Chairman C. Lalpianthanga chuan MPCC Vice President R. Lalzirliana Congress Party atanga hnawhchhuah a nih dan chungchang a sawi bawk a , “ R. Lalzirliana hi Dan chunga lengah a inngai a, hetia kan buaina pawh hi kum 2014 daih tawha intan niin 2014-a MP Election-ah pawh kan candidate a pui tha duh tawh lova. Vice President meuh ni chung si a, party dang MNF, ZPM leh BJP ten an sawm thu a sawi reng a. MPCC DAC ten MNF hruaitu thenkhat hnena kan hriat ruk danin election puan veleh MNF a luh a tum niin kan hriat bakah Saitual District Demand Committee hnenah Lal Thanhawla a CM chhung chu District in hmu lovang tiin kan CM zahawm tak chu a puh chhia ani,” a ti.