Vawiina zirlai kawngzawhin Aizawl khawpui lirthei kaldan a ti khaihlak rei. ” Zirlaite hmangaihtu Sawrkar kan mamawh ” – Jt.Students’ Union, Lumpsum HSS

Vawiin Inrinni September ni 15, 2018 hian Mizoram Govt.Lumpsum Grant- in – Aid Higher Secondary School pakua a zirlaite chuan Adhoc aided a an school hlankai phutna kalzel ah Chanmari kawn aṭangin Vanapa Hall kawt thleng kawng an zawh.

ZORAM TODAY:  Kawngzawh na a tel zirlaite hi – Farkawn HSS, E. Lungdar HSS, NE. Khawdungsei HSS, Phullen HSS, Sakawrdai HSS, West Phaileng HSS, Zobawk HSS, Thingsulthliah HSS leh Zawlnuam HSS te niin hemi hun hmang hian an aiawh zirlaite ṭheuh Aizawl ah lamkal tirin Mizoram sawrkar laka an thilphut lantir hian thingtlang zirlai 300 chuangin kawng hi an zawh ani.

Kawngzawh huaihawttu Joint Students’ Union te hi Tuichangral Zirlai Pawl (TCZP), Tuipuiral Zirlai Pawl (TZP), Sinlung Hills Students’ Union leh an mahni khawchhuak Aizawla awmte’n an thlawp bawk.

Tarlan tawh angin Lumpsum Grant- in – Aid HSS te hian July thla khan Adhoc aided a hlankai phutin zirna kar khat chhung an lo chawlhsan tawh a, august thla khan kawng block te pawh an lo nei tawh ani.

Heng school pakua te hi 2006 hmalam a din vek niin zirtirtute hlawh leh school inenkawl nan kum khatah Mizoram sawrkarin Rs. 140,000/- ṭheuh a pe thin a, hei hi an khawp khamloh thu leh Sawrkar school aia result nei ṭha ṭhin annih thu leh zirlai pawh ṭhahnem tak an awm tih sawiin tunah pawh zirlai 850 lai an awm  tih an tarlang a. Khawtlang mipui pawisa thawhkhawma zirna kalpui chu tun dinhmunah harsatna tamtak a awm thu an sawi ani.

Vawiin a kawngzawh zirlaite hian ” Zirlaite hmangaihtu Sawrkar kan mamawh”,tih te ” Zirlaite hmangaihna neilo Sawrkar – Bang rawhse” , ” Kan result hian Adhoc Aided hi chu a phu a sin “, tih te ” Mizoram sawrkar hian Adhoc aided School min pe ngei rawhse” tiin an au rual ani.  He hun ah hian Zirlai Pawl hruaitu hrang hrangte’n thusawina an nei bawk.

Lumpsum School zirlai hruaitute chuan an thil phut chu Mizoram sawrkarin a tih hlawhtlin sak ngei an beisei thu sawiin, a tul ang zela hmalak an tum thu an sawi a, hmun hla tak aṭanga mahni sum senga Aizawla kawngzawh tura kal zirlaite chungah lawmthu sawiin vawiin kawngzawh avanga lirthei leh mipui vahvelna an tihbuai chu pawi an tih thute leh khawpui mite lakah  hriatthiamna an dil nghal tih an sawi.