Naktuk ah thingtlang zirlaite’n Aizawl khawpuiah kawngzawh pui an huaihawt dawn

Naktuk Inrinni September 15, 2018 chawhma dar 10:00 hian Lumpsum Grant-in-Aid Higher Secondary School zirlaite chuan Adhoc Aided School a hlankai an phutna kal zelah Chanmari kawn aṭanga Vanapa Hall kawt thleng kawngzawh an tum. Thingtlang zirlaite Aizawlah an inkulh mek.

ZORAM TODAY:  Vawiina Aizawl Press Club a chanchinbu mite an kawmna ah Joint Students’ Union hruaitute chuan Mizoram Govt. Lumpsum Aided Higher Secondary School pakua – Phullen HSS, Thingsulthliah HSS, Tuisualral HSS, Zobawk HSS, Farkawn HSS, N.E Khawdungsei HSS, E.Lungdar HSS, W.Phaileng HSS leh Zawlnuam HSS hi kum-14 chuang theuh khawtlangin an lo enkawl tawh tih sawiin, ” Heng school te hi kum-2006 hmaa din vek anni a, kum-2008 khan Lumpsum Aided-a hlankai niin Lumpsum Fund hi school pakhatin kum khat chhung atan cheng 150000/- ṭheuh pek kan ni,” an ti.

” Zirtirtute hlawh pangngai tak pek a lo ngai ve a, khawtlangin thlatin cheng nuaih dawn ngaihtuah a ngai a, hei hi ni za inhlawhna aṭangin a ni ber a. Ni za inhlawhna kan hmuh ṭhatloh chuan zirtirtu ten hlawh lak tur an nei lo mai thin a; thawktute hlawh bakah school enkawlna mamawh reng a ni bawk a, ni za inhlawhna lah hi a mumal lo tawlh tawlh a, kan khawtlang hruaitute tan a buaithlak chho ta em em a ni” an ti bawk.

Joint Students’ Union President J.Lalrorela chuan ” Sawrkar term hmasa atang tawh khan Adhoc Grant-in-Aid dinhmunah hlang turin vawi tam kan lo ngen tawh thin a. Kan mamawhna a san em  avangin Managing Board, MIGLAHSSA leh Joint Students Union ten kan zirna in, sawrkar office zawng zawng khar leh Road Blockage thlengin hmalak a ni tawh,” a ti a. ” Tun thleng pawha ‘sum a awm lo’ tih bak chhanna kan hmu lo hi kan rilru a na hle ani,” a ti.

Heng school-te hian result tha tak tak an neih ṭhin thu sawiin, ” HSSLC exam-a top 10 nihna leh subject topper nihna hauh school te pawh kan lo awm tawh a, result leh naupang neih zat en pawh in Adhoc Grant-in-Aid a hlan kai kan phu hliah hliah a ni. Heng Lumpsum Higher Secondary School-te hi Govt. Higher Secondary School awmna atanga hla tak tak vek an ni bawk a, khaw mipui(population) ngaihtuah pawhin HSS changtlung zawk neih hi kan phu hle hlawm a ni,” an ti.

Heng school hrang hrang aṭang hian mi 2072 in hlawhtlinna an lo chang tawh tih sawiin, ” Tunah hian  school hrang hrang aṭangin 2018-2019 School Session ah Zirlai Naupang mi 850 vel an awm mek bawk. “Kan dinhmun, kan harsatna hi kan sawrkar leh zoram mipuite hian min hriatpui se kan duh takzet ani, ” an ti.

 Kawngzawh turte hi Higher Secondary school   pakua a zirlaite bakah Welfare Committee Aizawla awm heng khaw chhuak te, Sinlung Hills Students’ Union, Tuipuiral Zirlai Pawl, Tuichangral Zirlai Pawl leh Tuisualral Students Union-te pawhin kawngzawh hi an thlawp dawn niin an sawi.

 ” Khawtlang mipuite’n Sawrkarna (Congress in) an chan theih nana kan bial, kan khua ṭheuha kan lo puih tawhna zawng zawngte kha kan Sawrkar hian ngaihtuah let ve se, tun term chhung ngei hian Lumpsum Aided Higher School te hi Adhoc Grant-in-Aid hmanga min chhan let ve kan phut tlat ani” tiin vawiina thuthar thehdarhtute an kawmna ah an tarlang.