Vawiin khan Mizoram Pradesh Congress Committee ( MPCC) Vice President nilai leh Mizoram Sawrkara Home Minister ni bawk R.Lalzirliana chuan anihna Cabinet Minister aṭanga banna Chief Minister Lal Thanhawla hnenah a thehlut.
ZORAM TODAY: Congress Disciplinary Action Committee chuan tunhnai khan chhan hrang avanga insawifiah turin an Vice President R.Lalzirliana hi an ti a. A insawifiah loh chuan a chunga action lak anih tur thu an sawi bawk.
R.Lalzirliana hian vawiin Congress Party political session, Bhavan a neihah thu a sawi ngei a, he hun ah hian chanchinthar thehdarh tute tel a remloh avangin a thusawi hriat chian maitheih ani lo.
Home Minister leh Ṭawi bialtu nibawk chuan a ban chhanah Saitual district headquarters chu Congress Sawrkarin an function tir theihloh vangah a puh a, ” Hetiang boruak hnuaiah chuan nihna pawimawh tak chelh chunga he sawrkara ṭhut ve reng hi tih chi niin ka hre ta lo,” a ti.
MPCC Vice President chuan a bial mipuite’n hunrei tak aṭanga an lo beih tawh leh an duh ber district headquarters chu tihpuitling sak a chak thu sawiin ” Notification meuh siama Sawrkarin district a lo puan tawh hi kan function tir thei ta lova, kan sawrkar budget tamtawh dan en in awlsam te a function tir theih a nih pawh a lang reng ani,” tiin Chief Minister hnenah a ban na chhan ziakin a pe ani.
Zira chuan an President Lal Thanhawla’n ” Sawrkarna kan neih leh hunah Saitual bial aṭangin Development ṭan ani ang” tih te, ” MNF te’n fuke kimlo District an pe che u a, keini chuan fuke kim District kan pe ang che u” tih a sawi ṭhin lai a benga a la cham reng ṭhin thu sawi langin kum sawm zet an sawrkar chhunga an function tir thei ta lo chu a rilru nat thu a sawi bawk.
Bang lo theilo dinhmunah a ding tih sawiin Ṭawi bialtu MLA chuan ” In mi hriatthiamna pawh ka rawn ngen nghal bawk e. Party ah erawh chuan lungrual taka kan thawh ho zel theih ka beisei, ” a ti bawk.
Chanchinthar thehdarhtu ṭhenkhat te’n an kawmna ah R.Lalzirliana chuan Congress party an sawrkar leh a rin leh rinloh chungchang zawhna chhangin, ” Tun anga hmangaihna a daite anih chuan Sawrkar leh a har viau ang, ” a ti a, MLA ah erawh din nawn leh a tum thu sawiin Independent candidate anih loh tur thu a sawi thung.
