Serchhip bialah Lalduhoma a ding dawn ; Lal Thanhawla Vrs C.Lalramzauva , Lalduhoma kan hmu dawn?

“Pu Thena hi a boral hnu ah parthi awrhtir leh kan tum” – Lalduhoma

ZORAM TODAY: ZPM Chief Ministerial Candidate Lalduhoma chuan Pu Thena hi a boral hnu ah hian parthi awrhtir leh kan tum a ni, a ti.

Vawiin september ni 13, ningani hian Serchhip district ZPM Steering Committee buatsaih Workers Meet cum Political Training Serchhip Venglai YMA Hall-a neih a hmanpuina ah he thu hi a sawi a. “Pu Thena hi a boral hnu hian thusawi tir zel a, parthi awrhtir hi kan tum tlat a ni” a ti a. Kan hma lawka MLA inthlanpui kan hma chhawn mekah Serchhip Assembly Constituency-a din a tum thu leh a din chhan sawiin, Bible chang, “Khandaih te, thal te, fei te kengin i lo thawk a; kei zawng Engkim Lalpa, Israel-te Pathian, i cho hmingin ka lo thawk a ni” tih chu a innghahna a nih thu a sawi a.

Serchhip-a ZPM CM candidate ding tur hian serchhip district ZPM block leh Unit hrang hrangte’n ZPM thuneitu sangah ziakin an thlen a, hnial an nih chung pawha ding ngei tura duhna a len em vangin a ding dawn ta a ni, tiin ZPM thuchhuah chuan a tarlang.

Serchhip district ZPM Workers Meet cum Political Training-ah hian Chief Ministerial Candidate Lalduhoma chu a tlin ngei theih nan theihtawp chhuah an tum thu te, an dil ang ngei a CM candidate ding tura phalsak an ni chu ZPM hruaitute chungah Serchhip district ZPM chuan lawmthu an sawi bawk.

Inkhawm hi Serchhip district ZMP Chairman Rozamliana’n a kaihruai a ni.

Hetih lai hian Mizo National Front (MNF) MLA Nomination Committee chuan Serchhip bial vil turin Pu C. Lalramzauva, MNF Adviser bakah  Sr.Advocte nibawk chu an lo ruat tawh a, he bial ah hian  Lalthanhawla (INC), C. Lalramzauva ( MNF) leh Lalduhoma (ZPM) te chu an in khing dawn niin alang.