Ni li chhungin Aizawl leh hmun dangah thingtlang leh khawpui zirlaite’n kawng vawihnih zawh an tum!

MZP chuan Assam- Mizoram ramri chungchanga Mizoram Sawrkar kaldan duhtawk lovin hmalakna lian nei thuai turin sawrkar an phut nawn leh a, September ni 10 hmaa Mizoram Sawrkarin hmalakna lian tham a neih loh chuan tun thla ni 10,  nilaini hian Aizawl khawpui leh ramchhung hmun dangah kawngzawh pui huaihawt an tum.

Hetih mek lai hian Mizoram Govt.Lumpsum Aided Higher Secondary School dinna khaw pakua a zirlai leh mipuite chuan Mizoram sawrkara an thil phut Adhoc Aided dinhmuna hlankai annih loh chuan tun thla ni 15, inrinni hian Aizawl khawpui leh heng khaw pakua ah te hian zirlai leh khaw mipuite’n kawng zawh an tum bawk.

ZORAM TODAY: Nimin September ni 1, inrinni a thuthar thehdarh tute an kawmna ah MZP chuan Mizoram Sorkar thuneitu Congress Legislature Party (CLP) in a lo rel tawh angin Bairabi Zophaia Zofate Chawlhbuk sak anih theih nana hma la thuai turin MZP chuan Sorkar a phut , an ti.

MZP chuan Assam leh Mizoram ram ri siamfel anih theih nan Sawrkar laipui kaihhruaina hnuaiah theihtawpa hmalak anih thu an sawi a. Central Sawrkar hotute leh state pahnih a thuneitute’n hmalakna thui tak an neih thu sawiin MZP chuan Silchar a Union Home Ministry Joint Secretary hova meeting an neih hnuah state pahnih thuneitute thu a inhmuh fuhlo a, ramri enfiah chhunzawm ani ta lo niin an sawi.

” Mizoram Sawrkar leh MZP te chu hmala chhunzawm zel tura Union Home Ministry in min tih angin Chief Minister Pu Lal Thanhawla kaihhruaina hnuaiah Assam- Mizoram ramri zirchiangtu committee sang MZP telna  Core committee din ani ” MZP President L. Ramdinliana Renthlei chuan a ti.

MZP hruaitute chuan, ” Assam- Mizoram ramri zirchiang tute’n an report July ni 18, 2018 ral hmaa Chief Minister hnena thehlut tura tih chu report an thehluh loh avangin MZP chu August ni 3 khan Core Committee aṭangin kan in hnukdawk ani,” an ti.

L. Ramdinliana Renthlei chuan ” August ni 28 a MZP executive meeting chuan ramri chinfel kawnga Mizoram Sawrkar hmalakna chu lungawi thlakloh a ti ani” a ti a, ” Assam- Mizoram ramri chungchanga Mizo ṭhalaite hmalakna chhunzawm lova ngawihbo sana a awm mai tur hi hriatthiam har kan ti tazet ani,” MZP President chuan a ti bawk.

Ramri chinfel kawnga hmalakna chakzawk nei turin Mizoram sawrkar MZP in a ngen nawn leh thu sawiin, “September ni 10 hmaa hmalakna lian tham a awmloh chuan September ni 12 nilaini hian Mizo ṭhalaite’n Aizawl khawpui leh ram pumah kawng kan zawh dawn ani,” an ti a, hemi hnua kawngzawhin awmzia aneihloh chuan a ṭul ang zela hmalakna kalpui anih tur thu MZP hruaitute chuan an sawi bawk.

Hetih lai mek nimin Inrinni vek khan Aizawlah Mizoram Govt.Lumpsum Aided Higher Secondary School dinna khaw pakua a khawchhuak Welfare Committee leh MIGLAHSSA Joint Students’ hruaitute chuan meeting an nei a, Adhoc Grant- In – Aid a hlankai phutna kalzel ah Mizoram Sawrkain an thil phut hi an ti hlawhtling lo anih chuan September ni 15, 2018 Inrinni hian Aizawl khawpui leh heng khaw pakua ah te hian, zirlai leh mipuite’n kawngzawh an huaihawt dawn niin an sawi.

Tarlan tawh angin Lumpsum Aided HSS khaw pakua te hi – Farkawn, East Lungdar, Sakawrdai, NE Khawdungsei, Zawlnuam, West Phaileng, Thingsulthliah, Zobawk, Phullen te niin an thil phut tih hlawhtlin nan hian July ni 18 atang khan zirna chawlhsanin school kar khat chhung an lo khar tawh a, hmalakna in awmzia a neihloh avangin August ni 3 khan road block an khua ṭheuh ah an nei bawk ani.