E.Lungdar RD Block hnuaiah rangva bandle 160 a bo mek : E.Lungdar MNYF

Zoram Today:  Thingtlang khuaa cheng, In nei lote tana In thar sak leh Kutcha Ina khawsate thuam ṭhatna tura Mizoram Sorkarin NEDP kaltlanga Chief Minister’s Rural Housing Scheme a siam ah beneficiary thlan dan chungchangah tunhnai hian sawi neuh neuh a tam hle.

E.Lungdar MNF Ṭhalaite chuan thuchhuah an siamah E.Lungdar BDO hnuaia CM Rural Housing Scheme kaltlanga rangva dawng tur chhungkaw 77 zingah chhungkaw 37 te chauhin a takin an dawng tih sawiin, ” Rangva dawng ngei anga Sorkarin a chhinchhiah dawng si lo chhungkaw 40 an awm mek a, he thil thlen dan hi mak kan ti a, miretheite rahbena lian takah kan ngai ani,” an ti.

( Khaw 12 a hamṭhatna dawng tur tarlan zat)

MNYF, E. Lungdar hruaitute chuan RTI Act hmanga zawhna an siam ah rangva bandle 4 zel chhungkaw 77 te hnenah pek anih thuin min chhang, an ti a. Kan finfiah vek hnuah chhungkaw 37 chauhin a takin an dawng thung a, mak kan ti hle ani an ti. Mi harsate dawn tur rangva bandle 160 lai mai a khuangcher bo hmak ni a sawiin thil awmzia mipui hmaa sawi chiang thuai turin Hrangturzo East Block Congress hruaitute kan phut takzet ani an ti. Rangva bo te hi hmuhchhuah anih hma chu chhui zui zel an tum thu an tarlang bawk.

( Bialtu MLA leh Minister in ṭanpuina a sem lai)

CM Rural Housing Scheme hnuaiah hian a dawng tur beneficiary te thlanchhuah kawngah khawtlang hruaitute kaltlangin Gram Sabha ( Khawtlang mipui rorel) neih tur ani a, anni thlanchhuah hi a hmunah chik takin VLA te’n an endik hnuah District Level Committee in a thlang chhuak tur ani, tih ani.

N.Vanlaiphaia VC Member pakhat chuan an khuaa dawng tur chhungkaw 15 thlan danah VC hriattir chu sawiloh, Gram Sabha pawh koh anih loh thu leh an thlan dan kalphung an hriat veloh thu Zoram Today a hrilh. An khuaa dawng tura thlan chhungkaw 15 zingah chhungkaw 8 chauh in a takin an dawng ani.

Hetih mek lai hian Social Media ah Hrangturzo East Block Congress President Pu B. Lalliantluanga chuan ” Rangva hi bo pakhat mah a awmlo e. Khing atak a dawnglo zawngte khian bial chhung a pawimawh, natural calamity/leh emergency a hman atan an hming an surrender mai ani e,” tiin a sawi thung.