Congress Minister hluiin Congress-in dawi an thiam a ti

ZORAM TODAY: Sialhawk, Dt. 21/08/2018:
Vawiin khan Sialhawk Community Hall-ah Sialhawk MNF Group huaihawtin mithar lawmluhna hun hman a ni a, Congress Party leh ZNP aṭangin chhungkaw 55 aṭangin voter 137 Sr Vice President Pu Tawnluia’n a lawmlut. He huna thusawitu pakhat Pu Liansuama, Ex-Minister chuan, “Congress hian dawi an thiam a, cheng khatmah eiru lovin in ropui tak tak an sa khir iaih uaih,” a ti a, “Pu Hawla pawhin cheng khat mah eiru lovin Kolkata New Town-ah in a sa khirh uaih mai a ni. Dawi an thiam tak tak a nia,” a ti bawk.
MNF party atanga Tuichang biala ding tura ngaih Pu Tawnluia, MNF Senior Vice President chuan, “Tuichang bial Congress Ministry-in a hlamchhiah hi MNF sorkar thar chuan kan khaichhuak dawn a ni,” a ti a. “He Hnam leh he party hi Pathianin a lo hruai tawh a, a hruai zel dawn a ni,” a ti bawk. MNF Sr Vice President chuan, “Rorelna pakhat hnuaia Zofate kan awm hi MNF tum bulpui ber a la ni reng a, kan bei zel dawn a ni,” a ti bawk a ni.
Thusawitu dang Pu Lalruatkima chuan, Tuichang biala Congress candidate tur an puang nawn chhen mai chu mak a tih thu a sawi a. “Tuichang bialtu zahawm tak hi Congress-ah an chhiar ta lo nge an puang nawn chhen mai hi a mak hle,” a ti.
Vawiina lawmluhte bakah nimin khan Pu F Lalchangliana In Khawzawl Hermon Vengah mithar lawmluhna hun neih a ni a. Party hrang hrang aṭangin voter 125 MNF-ah lawmluh an ni a. Lawmluh zingah hian Hermon Veng VCP Pu F Lalchangliana a tel a. Hermon Veng Congress VC chu ṭhiatin MNF VC thar a piang niin MNF thuchhuah chuan a tarlang.