“Khawzawl tui min petu ; Khawzawl district function tir tur, ” tiin Khawzawlah mipui an au rual!

 Congress tih hlawhtlin duhloh Khawzawl district kan tih hlawhtling dawn: Tawnluia

Zoram Today: Vawiin August ni 20, Thawhṭanni hian Pu Tawnluia, MNF Sr.Vice President chuan a khua Khawzawl a lut a, khaw dai Chalthei kawnah mipui tam takin lirthei ṭhahnem takin an lo hmuak niin MNF party thuchhuah chuan a tarlang.

 Pu Tawnluia hi Khawzawl fanpui a nih hnuah Martar Thlanah Martar-te zahna pangpar a dah a, “Khawzawl tui min petu Pu Tawnluia dam reng rawh se,” tih leh “District function tirtu tur Pu Tawnluia kan lawm a che,” tiin mipuite hi an aurual a ni.

Dinthar Venga an chenna In kawta amah lo hmuaktute hmaah thusawiin, Pu Tawnluia chuan, “MNF-in sorkarna kan siam a nih chuan Congress-in an tihhlawhtlin duh loh MNF sorkar-in District a lo pek tawh Khawzawl District hi kan tihlawhtling nghal dawn a ni,” a ti a. Mualvawm Field chu phullem phah a nih tur thu a sawi bawk.

MNF Sr Vice President chuan, Khawzawl mipuiin ropui taka an lo hmuak chu lawmawm a tih thu a sawi a, “Ka mittui a tla hial a ni,” a ti a. “MNF nomination committee-in thlutlukna siamin Tuichang biala ding a, tun aṭanga vil ṭan tura tih ka ni a. Tling lo leh fel lo ber ni mah ila Tuichang bial mipuite rawngbawl tura tih ka ni hi ka lawm a ni,” a ti.

Pu Tawnluia chuan, “Vawiinah hian chhuan tur ka nei lova, Lalpa engkim tithei chauh chhuan tur ka nei a ni. Pathianin kan mamawh a hria a, Tuichang bial mamawh a hria a, Zoram mamawh a hria a ni. Lalpa ṭanpuina dil chhungin Tuichang mipuite ṭawiawmna ka ngen a ni,” a ti bawk.

Pu Tawnluia hi Pu Liansuama Adviser, Pu Lalruatkima MLA, Pu C Lalmuanpuia AMC Councillor, Pu Laltlanzova Khiangte, AMC Councillor leh hruaitu ṭhahnem takin an ṭawiawm a ni.

Pu Tawnluia leh amah zuitute hian Tuichang bial khaw hrang hrang an tlawh dawn nghal dawn niin an thuchhuah ah tarlan ani.