MNF Ṭhalaiin Minister John Rotluangliana thusawi mipui hnuaichhiahna an ti

Zoram Today: MNF Ṭhalai chuan August ni 18, Inrinni khan thuchhuah siamin tunhnaia Minister pakhat John Rotluangliana’n Lunglei Congress Bhavan-ah ‘Zu kan zuar lo, a zawrh phalna (permit) kan pe’ a ti niin a lang, an ti a. Hei hi MNF Ṭhalai chuan kan la thutak hle tiin, “Zu hi Pathian thu sawi tui nan a ṭha” tituin hetiang thil a sawi ta mai hi mipui bum tumna a nih piah lamah, mipui hnuaichhiahna niin kan hria, an ti.

Congress sorkar hian March ni 16, 2015 aṭanga zu zuar chhuak ṭan thu sawiin MNYF chuan, ” Kum thum chuang zet chu an zuar ta a, sorkar hnuaiah PSU pawimawh tak pathum MIFCO, ZIDCO leh MAMCO te chuan zu an zuar a, Congress Ex-Minister Pu S. Hiato te chhungkuain zu dahkhawlna hmunpui (warehouse) SS Enterprise an nei a, Congress Minister Pu Zodintluanga leh MLA Pu Chalrosanga te chhungkuain RTP Warehouse lian tak an nei bawk “, tiin . ” Hei lo liama zu zuar sorkar a awm thei chuang lo. Kan minister hian mipuite hi min ṭawng khum mai mai tawh lo se kan duh hle a ni,” an ti.

(Pic : Sports Minister Zodintluanga, MLA Chalrosanga leh Ex Minister S.Hiato)

” Minister-in ‘zu zawrh phalna kan pe’ a tih hi, zu zawrh phalna bakah zu lei theihna leh zu in theihna permit an pe tel nghal a. Chumi avangin hmeithai tam berna state, mi cheng zat azira HIV/AIDS vei tamna state, zu in nasat avanga police leh Mizo ṭhalaite an pulh puk pukna state kan nih phah a, chutiang state nih zel theihna permit min pe tel a ni.” tiin an thuchhuah ah an tarlang.

MNF Ṭhalai chuan,  ” Congress sorkar hian zu hi an zuar a ni mai lo va, an in a, an tlàn a, zu zawrh aṭanga chhiah lut zat hi chhuang takin an sawi ṭhin, ” an ti bawk.