College zirtirtu leh RUSA hnuaia Asst.Professor tur Congress Sorkar hian la thar vat rawhse: MNF Ṭhalai

Zoram Today: MNF Ṭhalaite chuan August ni 8, 2018 khan Aizawl Press Club ah thuthar thehdarhtute an kawma, MNYF Vice President Lalremruata Chhangte chuan, ” Congress kaihhruai Mizoram sorkarin zirna sang zawka zirna a ngaihthah hlein kan hria a. Tunah hian H&TE dept. hnuaia sorkar college sawmhnih paruk (26)-ah post awm sa (sanctioned post) a ruak hnawhkhah loh za sawmnga pakhat (151) lai a awm mek a. College zirtirtu indaih loh avangin zirlai leh zirtirtute’n harsatna an tawk nasa a, college ṭhenkhat chuan an college sumin zirtirtu an ruai hial a. He harsatna su kiang turin college zirirtu (Asst. Professor) la thuai turin MNF Ṭhalaite chuan sorkar kan phut a ni”, a ti.

MSU General Secretary hlui chuan ” Kum 2017-2018 academic session khan college 26 ah hian zirlai 14,036 lai an awm a, kumtinin college zirlai an pung zel a, zirtirtu sanctioned post hi zariat sawmthum pahnih (832) lai ni mah se, hnawhkhah a nih loh avangin regular post-ah zirtirtu 681 chauh an awm a, zirtirtu indaih lohna a nasa em em a; contract leh part time-a thawkte avangin sorkar a la mualpho thui lo mai zawkah kan ngai a ni.” a ti bawk.

Lalremruata Chhangte chuan ” Hetianga zirtirtu an indaih loh em avang hian college hrang hrangte’n zirlai an la tam thei lo va, Aizawl khawpui bikah phei chuan kumtin college luhna chang lo zirlai ṭhahnem tak an awm zel a, pawi kan ti tak zet a, hei hi sorkarin a tihtur a tih loh vangah kan ngai a ni,” tiin Sorkar a dem thu a sawi.

MNF Ṭhalai Vice President chuan ,” Tun hnai kum nga (5) chhungin zirtirtu a ngheta lak (direct recruitment) sorkarin a nei mumal lova, 2014 leh 2016 kumah college hrang hrang tan zirtirtu sawm leh pakhat (11) contract basis-in an la a, Part time-a thawk contract a dah leh, contract-a thawk dah ngheh awm mah se zirtirtu indaih lohna a phuhruk zo tak tak chuang lo,” a ti bawk.

Rashtryia Uchchatar Shiksha Abhyian (RUSA) project India ram state hrang hrangah kalpui a nih thusawiin Lalremruata Chhangte chuan, “Mizoram pawhin kan chhawr nasa hle. He scheme hi awm lo phei sela chuan H&TE department hma lam thimzia a hmuh theih a ni. Mizoram sorkarin 90/10 hmanga a tum ve tur college hrang hranga  thawk tur Asst. Professor post 70 chuang zet kum 2014 aṭanga vawiin thlenga a thar hlaka (direct recruitment) lak a ni lo hi kan hrethiam lo va, Mizo zirlaite ngaihthahna lian takah kan ngai a ni. dawrawm te te siam lova tun sorkar kal lai tawp hma ngei hian hna ruak pangngai 151 bakah RUSA hnuaia Asst. Professor post 70 chuang lai hi la thuai turin MNF Ṭhalaite chuan Congress sorkar kan phut a ni.” a ti bawk.

College hrang hranga principal nghet an awm theih nan dân mumal leh rintlak tak siam turin sorkar an phut thu a sawi bawk a. ” A ṭhena UGC rules hmana a ṭhena hman leh si loh awm tawh lovin a tling leh tlakte ngei principal nghet atana lak an nih theih nan ruahmana siam turin sorkar kan phut a, principal nghet neih loh avangin college kalphung (administration) a buai a, zirnain a tuar em em a ni,” Lalremruata chuan a ti.

MNF Ṭhalai Vice President chuan ” Kum 2020 a thlen chuan tuna college zirtirtu nghet te zingah 60 vel pension in an chhuak tawh dawn a, zirtirtu a thar hlaka lak hi sorkar tan tihmakmawh ani tawh ani” a ti bawk.