Mizoram sorkarin State Lottery a kalpui dan an duhloh avanga MNF Țhalaite’n ni hnih chhung Directorate of Institutional Finance & State Lottery Office, hnathawk thei lova an dan beh hnuah Mizoram sorkar chuan vawiin July ni 10 khan notification ti chhuakin, distributors/ selling agents te kaltlanga nitin Lottery an vawr țhin chu thuleh awm hma an ti tawp a, MNF Țhalaite pawhin an hmalakna an ti tawp lailawk ve nghal.
July 10th, Aizawl Zoram Today: MNF Țhalaite hian nimin July ni 9, thawhțanni ațang khan Lottery Office, Tuikhuahtlanga awm chu hnathawk thei lovin an dang chat a, vawiin khan chhunzawm lehin nilengin he office a kai turte hi an dang ani. MNF Țhalaite hian vawiina Director office kai tur lo dang mahse buaina chhuak a awm lo.
 |
| (Sorkar notification) |
MNF Țhalaite’n ni hnih lai Lottery office an dan chah hnuin vawiin tlai lam khan Finance Minister Pu Lalsawta hova Addl.Secretary( Fin.), Director leh Joint Director, State Lottery Office te’n meeting neiin sorkar chuan thuleh awm hma lottery an vawr chu an titawp nghal ani.
MNF hotu sangte’n sorkar notification an hriat hnu hian hmalak zel dan tur an ngaihtuah ho ani. Sorkar lam ațanin Addl.Secretary hovin MNF hruaitu țhenkhatte chuan inbiakna an nei a, Lottery vawr mek tih tawp anih avang leh sorkar sum bawma pawisa chhung tam thei tur thlang tura tender chhuah țha tur leh dan hman mek pawh siamțhat dan ngaihtuah an intiam hnuah MNF Țhalaite’n lungawilohna an lan tir mek chu tiamchin awm lovin an titawp lailawk ve nghal ani.
MNF Țhalai President Er.Lalrinawma, MLA chuan ” Lottery vawr mek thuleh awm hma sorkarin an tihtawp avang leh, tender chhuah țhat a, kalphung tihdanglam ngaite en hova sawiho sorkar lamin an in tiam avangin kan lungawilohna kan chawl lailawk rih dawn ani,” a ti a, sorkar hmalakna enzui zela thil kaldan tur pangai anga sorkar a kalloh chuan a țul anga hmalak tum anih thu a sawi lang nghal bawk.
MNF Party hian Mizoram sorkarin Lottery a kalpui dan chungchangah hian President Pu Zoramthanga telin vawi 6 zet a țhat tawkloh thu leh a diklohna media mite hmaah press conference an lo nei tawh ani.
Mizoram Sorkar hian kum 2012 khan distributor/selling agent pa li thlang chhuakin nimin piah thleng Lottery vawr hi an kalpui țhin a, kumkhat chhunga ni 365 ah ni 362 chu nitin Mizoram sum bawmah nuai nga leh sangruk vel an chhunglut ziah țhin niin thudawn ani.
Hetih lai hian kum 2012 -2015 a heng firm pa li te Lottery vawr atanga sum lut leh sorkara an sum pek khaikhinin CAG chuan cheng vbc. 11808.77 lai bothláu angin kum 2016 khan audit report a nei ani.
Mizoram sorkar rawih heng Lottery kalpuitu firm pali te agreement a tawp hnuah tender dang chhuah țha lovin sorkar chuan kum thum chhung an hun a pawtsei a, hemi tawp hnu ah kumkhat dang pawisei in; he term a tawp hnu hian kumin september thleng an contract an pawhsei sak leh niin MNF Țhalaite hian an tarlang a, kum 6/7 dawn mai tender chhuah țha leh miah lova Sorkar a awmthei chu puan hnuaithil a awm lian hle ah an ngai ani.
MNF Țhalaite hian Lottery buaipui tur thlan anih dawna tender chhuah anihin Mizoram sorkar sum bawma chhunglut tam thei zawk turte thlang duh lovin Chief Minister Lal Thanhawla’n hnungthak a hiah zawm pui theih tur a thlang chhuak kha pawi kan ti a, sorkarin sum tamtak a hloh phah hial hi nâ kan ti, tiin nimin leh vawiin lama an thusawiah an tarlang ani.
Mizoram sorkar hnuaia Lottery kalpui mek tute hi :
1) M/S Teesta Distributors
2) M/S Summit Online Trade Solution
3) M/S NV International
4) M/S Ecool Gaming Solution
Heng selling agent te hian nitin State Lottery office ah hian țum 23 aia tam lo Lottery hi online in an vawr țhin ani.