Thai naupang chhanchhuah hna țum 2-na țan leh ta; zanin dar 7:30 – 8:30 pm inkarah beisei ani

           
Aizawl 9th July, 2018 Thawhťanni
– by CT Lalrinawma

“Tham Luang Nang Non Cave” puka Thai mipa naupang footballers la tang mek 8 leh an Coach kum 25 mi, Ekapal Chanathawong te lak chhuak leh turin, vawiin dar 11am (local time) khan Expert divers 18 te chu hmanraw famkim nen an lut leh ta. Tham Luang Nang Non puka la tangkhang mi 9 te chu “Pattaya Beach” an tih mai laiah an la awm a, chumi hmun va thleng turin a lo berah harsa takin darkar 5 kal a ngai a, an lo let leh lamah darkar 6 hmang tura chhut niin, zanina an rawn hruai chhuah hmasak berte hi zan dar 7:30pm-8:30pm inkar (IST ah zan 6pm vel) ah an lo chhuak thei chauh tura ngaih an ni.

Pattay Beach hi Puk chhung 500m (3.2km) ah awmin, chumi va thlen pawh a harsa hle niin an sawi. A kawng a kikawiin kal vel a harsa hle a ni.

Zanina an rawn hruai chhuah hmasak turte hi “dam tha leh inpeihte” an ni ang. Julie Bishop, Australian Foreign Minister chuan, “Tha takin vawikhat (group) ah mi 4 anga rawn hruai chhuah theih beisei a ni. Australia chuan he rescue operation turin Thai sorkar chu theihtawpin a thawhpui a, diver experts 19 tirh an ni” a ti.

President Donald Trump pawhin, “Puk a naupangte chhanchhuah hna thawh chu uluk takin US in a thlir reng a ni” a ti bawk. US Air Forces leh Navy SEALs divers te pawh Japan atangin Mae Sai, Chiangrai (Thailand) tirh an ni.

He Operation Rescue Mission ah hian Diver experts 90 an thawk a, foreigners 50 leh Thai divers 40 an ni. Ngawrh takin hma an la reng.

Anupong Paojinda, Thailand’s Interior Minister chuan, “Naupang puk chhunga la awmte chu doctors enkawlin an awm a, an chak thain an him e (strong and safe now)” a ti a. Mahse, naupang chhanchhuah turte chu puk thim tak mai, tuihnuaiah liluh puia tuihleuh pui an nih chuan awlsam takin an chi-ai (panic) thei a, fimkhur a ngai hle a ni” a ti.

Thai Navy Seals thin  Basan Kunan (38) chuan oxygen a va pe, kir leh lam chu boruak tlakchham vangin Monk Junction (T-sunction) ah Zirtawpni kalta khan a lo thih phah tawh a ni. Kunan hian Bangkok atanga Chiang Rai hmuna “operation rescue mission” titura in volunteer a kal hian a phur hle a, midangte chhanchhuahna tura inpek chu a tlawmngaihna zawng a ni a; Bangkok airport ah a thian, a thawhpui hluite chu a hmanraw famkim nen “Thlawhnaah ka thawmhnaw ka dah tawh e. Chiang Rai-ah inhmu ang u aw” tiin hlim takin a vailiam a, mahse, vanduaithlak takin midangte chhanchhuah a tumna lamah a nun a chan phah ta si. A nupui a thihsan a, a ruang hi Royal family sum tumin Bangkok ah vuiliam a ni.

Vawiinah Thai PM Gen. Prayut Chan-o-cha pawhin he lai “Luang Tham Nang Non” hmun hi tlawh tura ngaih a ni.

Nizan-Sunday zan khan Divers te hmanrua thenkhat chu siam fel ngaiin, air tanks chhun khah te,  rescue system siamthat te a ngaih vangin darkar 10-20 inkar chu chawlhsan lailawk a ni.

THIL NAMAI ANI DAWN LO!

Mipa naupang kum 11-16 inkarte tan an oxygen hip tur paina, 12lit air tanks chu a rih avangin tui chhungah liluh a, hleih pui chi a ni dawn lova. Heng air-tank te hi anmahni hruaitu divers 2 ten kengin, diver hnen atangin oxygen pek an ni anga; a bik taka siam full-face masks, wetsuits, boots, helmets erawhin an inthuam a ngai thung a ni. Chutichuan 8mm hrui zam (static rope) chu vuan phei zelin, tuihnuaiah leh puk zim laite leh chirh (muddy) an kal pelh hunah, air tlakchham thuta dah khah lehna tur (air-tank filled) an chawl lai lawkin, Puk pawn lo chhuah zel an tum dawn a ni.

Nizana naupang hruaichhuahte hi a thenin mi 6 an ti a, mahse, mi 4 an ni. Thuthangah chuan Coach Ekka chuan a naute riltam ei tur neilo chu a ei tur a pek vek avangin a chak lovin a dam tha lova, hruai chhuah hmasak zingah a tel a ni, an ti. Mahse, a hnuah he thu hi finfiah a ni lo. Naupang hruai chhuah mi 4 te chu an hming puan a la ni lova, uluk takin Chiang Rai Chapanukoh Hospital Floor 8naah medic team-ten an enkawl a, an hriselna endik sak an ni. An chhungte pawhin an la hre lo. Zanin erawh darthlalang phen atangin an chhungte hnai zualte chu an hmuh tir chauh ang.

Vawiinah naupang chhanchhuahte chuan an Thai chaw “Khao Pad Kroprawn” (basil chicken with rice) an ei chak thute an sawi a ni. An school kalna exam pawh karleh mai a ni tawh a, mahse, Mae Sai Prasitsat School naupangte chu an hotuten an thiante rolru ti na zawnga tawngkam cheh lo turin an lo zirtir lawk a ni.

Kattichok Kankawe chuan a thianpa Footballer Nattawut Takamsin chu, theihtawpin a Home-Works te tihpui tiamin, tanpui ka tum a ni, a ti.

Thai naupangte hi an chuap X-Ray, thisen test, zun test sak vek annih hnuah chauh, an chhungte nen inkhawih, inpawm phalsak an ni ang. Doctor te chuan “Leptospirosis” leh “Meliodosis” natna lakah an fihlim en tihte an endik sak vek dawn a ni. Zanin dar 6-7pm inkarah BBC/ Al Jazeera, CNN etc TV atangin Live-in an pekchhuah leh hmel a, i hmuh duh chuan i Television On lo chang khiau ang che.