MZP in zirtirtu rualkhai taka sem hna thawk thuai turin Mizoram sorkar a phut

Aizawl July 7th, 2018 Inrinni
* MZP in zirtirtu semrual hna thawk thuai turin sorkar a kar
*Sorkar hmalakna an thlir zui dawn
*Ziritrtu an tam, sem rual loh vang ani
*SSA/RMSA zirtirtu atana lak office hrang hranga awmte an awmna hmun ah kal thuai turin an phut

Zoram Today: MZP chuan Mizoram Sorkar enkawl zirna in Primary School ațanga Higher Secondary School a zirtirtu inkhairuallo lutuk chu tha lo a tih thu sawiin zirtirtu semrual hna thawk thuai tura Mizoram sorkar an phut thu vawiin khan Aizawl Press Club ah chanchinbu mite hmaah an sawi.

MZP chuan zirtitrtu  inkhairuallo chu nasa takin zirna In țhenkhat ah zirna dinhmun a chhiat phah hle niin an sawi a. MZP President L.Ramdinliana Renthlei chuan, ” Zirtirtu indaihlohna school hi a bikin thingtlang khua ah a nasa bik niin MZP chuan a hriain, Mizoram a zirlai thahnem takin an tuar nasa hle a, khawpui leh thingtlang lam zirlaiten zirna dinhmun in ang tlang leh in tluktlang taka zirna tha an dawn theih hi MZP chuan a duh hle ani,” ati.

MZP chuan Directorate of School Education Statistical Cell-in zirtirtu leh naupang awmdan a tarlan na ah School Education department hnuaia zirna in hrang hrang leh zirtirtu awm zat chiang takin a tarlang a. L.Ramdinliana chuan, ” Heti zozai zirtirtu an awm chunga zirna in hrang hrang (a bikin thingtlang School) ah zirtirtu indaih lohna a nasa em em reng mai hi MZP chuan mak a ti a, hei hi a chhan chu zirtirtu tlem em em vang pawh ni lo in, zirtirtu awm sa rualkhai taka thingtlang leh khawpui school-ah te semrual an nih loh vang niin MZP chuan a hria a ni,” a ti.

MZP President chuan Zirtirtu awmsa semrual chungchangah hian School Education Minister leh Chief Minister an sawipui tawh, tih sawiin ” Zirtirtu semrual chungchanga hma la tura ngenna ziak a thehluh a ni tawh bawk a ni,”a ti a, MZP chuan chak lehzuala zirtirtu semrual hi kalpui turin thuneitute a ngen nawn leh thu a sawi.

” Zirtirtu awmsa semrual chungchangah hian thuneitu te leh Sorkara thil ti thei tak tak te in rawlh lo tur leh harsatna thlen lo turin kan ngen a, khawpuiah zirtirtu tam tak an awm lai a thingtlanga an indaihlo em em mai hi a mak a, hei hi thuneitu ten hma an lak loh vanga MZP chuan a ngai a ni,” Ramdinliana chuan a ti.

 MZP in a zirchianna ah chuan Aizawl-a Sorkar enkawl Primary school thenkhat ah chuan zirlai 55 awmna ah zirtirtu 8 awmna te, zirlai 63 awmna ah zirtirtu 10 awmna te, zirlai 60 awmna ah zirtirtu 8 awmna te leh zirlai 15 awmna ah zirtirtu 5 awmna te a awm a ni. Aizawl khawchhung Sorkar enkawl Middle school thenkhat ah chuan zirlai 39 awmna ah zirtirtu 10 awmna te, zirlai 96 awmna ah zirtirtu 9 awmna te, zirlai 15 awmna ah zirtirtu 8 awmna te, zirlai 43 awmna ah zirtirtu 11 awmna te leh zirlai 93 awmna ah zirtirtu 12 awmna te a awm bawk , tiin an press statement ah dah lan ani.

MZP chuan Sorkar enkawl high school thenkhat ah chuan zirlai 35 awmna ah zirtirtu 9 awmna te, zirlai 47 awmna ah zirtirtu 10 awmna te, zirlai 63 awmna ah zirtirtu  11 awmna te leh zirlai 44 awmna ah zirtirtu 8 awmna te a awm a  ni. Aizawl ah zirtirtu kan indaih viau lai hian MZP a in report Thingtlang Primary school 11 te chuan zirtirtu pakhat(1) chiah an nei a heng zirtirtu pakhat nei te hian zirlai 42 te, 45 te an enkawl a ngai a, Thingtlang Primary school 45 te chuan zirtirtu 2 chiah an nei a, Thingtlang Primary school 30 te chuan zirtirtu 3 chiah an nei bawk a ni. Tin, Thingtlang Middle School leh High School ah hian zirtirtu an indaih lo hle bawk a ni, an ti.

MZP President chuan, ” Zirtirtu tura lak ni si SSA a ni emaw RMSA a ni emaw zirtirtu pangngai pawh School Education Department Office hrang hranga awm(attach) an thahnem hle a, tin zirtirtu lak thar thingtlang lama post ten an thil tihtheihna hmangin transfer an dil thin a hei hi MZP chuan tha lo a ti hle a ni,” a ti a. Heng zirtirtu tura lak office hrang hranga attach a awm te hi an awmna tur hmunah kal turin MZP chuan a ngen nghal bawk, tiin an tarlang.