MZU Southern campus din anih theihnan Dr. Thangtea’n MZU VC a hmu

Aizawl July 7th, 2018 Inrinni

Zoram Today: Nimin July ni 6 zirtawpni khan MNF party Vice President Dr R. Lalthangliana chuan Mizoram University Vice Chancellor Prof. KRS Sambasiva Rao chu hmuin zirna chungchangah thil pawimawh hrang hrang a sawipui.

Dr. Thangtea chuan MZU Southern Campus, Lunglei-ah hawn a pawimawh thu MZU VC thar hi a hrilh nawn leh a. Vice Chancellor hian Ministry of Human Resources Development (MHRD) ah ṭum hnih lai thlen a ni tawh tih sawiin, Secretary nen hemi chungchangah hian an inbe mek zel tih a sawi a, “A rang thei ang berin Southern Campus hi hawn tum a ni ang, a hun chiah chu ka sawi thei lova, VC ka nih chhung hi chuan hawn a nih ngei ka beisei ani,” a ti.

MNF Vice President chuan MZU chu MNF leh India sorkar inremna thuthlung (Memorandum of Sattlement) hrin chhuah a nih thu  MZU VC hi a hrilh a, “He University hi MNF hian kan inti neitu em em a, a chhiat a ṭhatah hian mawhphur vein kan inhria a ni,” a ti bawk.

(Dr. R Lalthangliana, MNF Vice President)

MZU Southern Campus din anih theihnan hian Lunglei a pawl hrang hrang- Sub -Hqrs YMA, Chhimbial chhantu te, MSU leh MZP te pawhin theihtawp an lo chhuah tawh a, a hlawhtling hman țhelh ani. Hemi hnu hian kawng hrang hrangin harsatna a awm a, hmalakna awm zel mahse thawm ri va a tam zui lo.

Dr. Thangtea chuan Prof Rao chu VC a nih hnuah Pachhunga University College-ah Post Graduate zir theihna department pathum (Mizo, Life Science leh Philosophy) a hawn thar a ni ta chu lawmawm a tih thusawiin MZU VC hi lawmthu a hrilh a. MZU-a subject zir theiha awm si, College-a subject awm si lo awm nual chu enzui se a duh thu VC hi a hrilh bawk.

 Dr. Thangtea chuan MNF-in sorkar-na a chan veleh MZU-in tui chungchanga harsatna a tawh te, Campus chhung inkalpawhna a harsatna awmte, power supply hnianghnar tawk lo leh public transport system-in campus a thleng lo te  state sorkar lama tih theih awm ang angin  sutkian a nih tur thu VC hi a hrilh bawk.