MNF hruaitu lawk te’n zirna kalphunga Congress sorkar duh khawplohna resolution pass

Aizawl 6th July, 2018 Zirtawpni
*Lumpsum Grant – In- Aid leh Adhoc Aided School te sorkar dinhmun ah dah rawhse.

*Rang takin post matrict tribal scholarship sorkarin zirlaite hnenah pe chhuak rawhse.

Zoram Today: July ni 5, ningani khan Mizo Hnam Run, Aizawl ah MNF party chuan Office Bearers Meeting an nei a, a hnuaia mi ang hian resolution an pass:

 ” MNF sorkar-in Higher Secondary School 9 Lumpsum Grant-In-Aid dinhmuna a dah, kum 9 a ral hnu pawha Congress sorkar-in dinhmun sanga a dah thei lo hi MNF chuan pawi a ti a, School rei tak khar a ni ta hial hi a pawi takzet a ni. Heng Lumpsum Grant-In-Aid School te bakah Adhoc Aided School e’ngemaw zatte hi sorkar-in dinhmun sang zawkah dah rawh se,” an ti.

” Higher Secondary School leh College-a admission harsa em em mai hi a pawi takzet a. Admission harsa lutuk avanga Nu leh pa leh zirlaiten harsatna lian tak an tawk ta mek zel hi MNF chuan a sutkian dan zawng vat turin sorkar a phut a ni,” an ti bawk.

MNF chuan ” CSS Hindi zirtirtu mi 1305, Congress sorkar-in duh taka an lak ngei hrawkhrui zaichah saka ban an ni leh ta si kha a pawi takzet a. CSS Hindi Teacher-te thawh theih hun a tawpin MNF sorkar hunlai chuan sorkar-a an luh dan ngaihtuah ṭhin a ni a. Congress sorkar-a CSS Hindi Teacher-te ban an nih takah hian hun kalzel turah Hindi Teacher lak danah harsatna a thlen thei a, a pawi takzet a ni,” tiin.

 ” SSA hnuaia Zirtirtuten MNF sorkar hunlaiin hlawh mumal takin thla tin an la ṭhin a. Congress sorkarah thla li (4) te, thla nga (5) te hlawh an la thei lo reng mai hi a pawi takzet a. Hetiang thil thleng ṭhin hian Congress sorkar-in zirna a ngaihthah zia a tilang chiang hle a ni,” an ti a.

” Post Graduate zirlai sang (1000) chuangin Post Graduate Scholarship tun thlenga an la la thei lo hi a pawi hle a. Rang taka Post Graduate Scholarship pe turin sorkar kan phut a ni,” tiin resolution ah tarlan ani.

MNF chuan, ” MNF sorkar lai khan zirna kawnga hmasawn nan Mizoram Education Act passed a ni a. He act hnuaia rules ṭha tak takte Congress sorkar-in a hmang ṭangkai duh tlat lo hi zirna ngaihthahna dik tak a ni,” an ti bawk.

MNF chuan Pathian leh mipui zara sorkar-na a siam veleh New Education Policy duan sa a kalpui tur thu an tarlang a. ” Heng harsatna hrang hrang Congress sorkar-in a ngaihna a hriat lohte hi MNF chuan a sukiang dawn a. Education Policy thar hmangin zirna kawnga hmasawnna nasa tak thlen turin ruahmanna duan fel a ni tawh a ni”, tiin an tarlang. 

 Sawhthing chungchang sawiin, ” Mizoram hmun hrang hranga sawhthing chingtuten hralhna hre lova an dahṭawih mek hi a pawi takzet a. MNF-in sorkar-na a siam hunah chuan Socio Economic Development Project (SEDP) hmangin, sawhthing chingtute tan awmze nei takin hmalak a ni dawn a. Ram chhung mai ni lovin ram pawn thlengin a hralhna tur rate ṭha tak ngaihtuah a ni ang a. Sawhthing chingtute’n an thlai chinah chhiatna/vanduaina an tawh palhin Crop Insurance ṭha tak tihsak an ni dawn a. Rate ṭha taka sawhthing chingtute’n an hralh theih nan sorkar-in Price Support a pe dawn bawk a ni”, tiin an thuchhuah ah an tarlang.