Zophai buaina a Assam Police te’n MZP te bungraw halchhiat man hu rulhlet dan tur MZP in a ngaihtuah dawn

Aizawl 5th July, 2018 Ningani

* MZP in College zirlai hruaitu leh hnampual zirlai hruaitu chawimawi

* NDA a tling mizo zirlai chawimawi tel

Zoram Today: July ni 5, vawiin chhun dar 12 khan MZP chuan MZP Conference hall, Aizawl-ah kum  2017-2018 academic session-a MZP member zinga College Students’ Union leader leh Hnampual hruaitu degree neithar te chawimawina hun an hmang a, hemi rual hian National Defence Academy(NDA) tling thar mi pahnih Joel Thangeo S/o Kaizamang Thangeo leh VL. Malsawmzuala S/o VL. Zaikima te hnenah MZP chuan lawmpuina leh chawimawina thuziak an hlan nghal a, Sorkar lam ațangin Mizoram Youth Commission(MYC) Chairman, Pu Joseph Lalhimpuia’n a hmanpui.

  Thusawitu MZP President L. Ramdinliana Renthlei chuan “MZP chhungkua hlawhtlinna changtharte thinglung takin kan lawmpui ani”, a ti a. Zirlai hlawhtlinna chang dangte aia a lawmawm bik na sawiin MZP President chuan, ” Hruaitute chu kan zirlai puite harsatna leh college tana nasa taka hna kan thawh țhin laiin, kan zirlaipui tam zawkte chuan class țha takin an kal hman a. Hruaitute erawh chu thil țul leh pawimawh kan ngaihtuah tam avangin zirna leh class pawh kan awm mumal thei țhin lo ani” tiin an zirlaipuite entawn tlaka result țha neih a țul țhin avangin midangte ai pawha  thawhrim leh zir nasat zel a țul thu a sawi bawk.

” Vawiina College SU hruaitu kan chawimawite hi in fakawmin MZP chuan a chhung takzet che u a ni”, Ramdinliana chuan a ti.

MZP President chuan, MZP te’n Zophai-a kan buainaah College leh hnampual hruaitute thawmhnaw, bungrua leh pawisa tam tak Assam police ten an hal chhia a, Assam sorkar hnenah rulleh vek tura ngenna kan thehluh tawh chu tun thlengin chhanna leh hlawhtlinna an la hmuhloh thu a sawi a, ” Mizoram sorkar hotute hnenah pawh ziaka thlen a lo ni tawh bawk a, MZP chhungkua, College zirlaite leh hnampual hruaitute thil bo hlutna hi hmuhlet leh a nih theih nan Mizoram chhunga Assamese awmte hnenah emaw Mizo mipuite hnenah Vehbur khawn mai MZP chuan a duh tawh a, Committee ah ngun takin kan rel ang a, Assam police in zirlaite bungrua leh pawisa an hal ral tak te hmuhlet a nih theih nan hma kan la dawn a ni”, a ti.

MZP President chuan ” Assam leh Mizoram ramri buaiah pawh Sorkar kaihhruaina in hmalakna a kal ve bek bek a, hemi chungchangah hian MZP pawhin hma a la chhunzawm zel dawn a ni.” a ti bawk.

MZP hian National Defence Academy(NDA) tling thar mi pahnih Joel Thangeo S/o Kaizamang Thangeo leh VL. Malsawmzuala S/o VL. Zaikima te leh MZP chhungkua, College Students’ Union Leader leh hnampual hruaitute  hnenah hian  chawimawina thuziak a hlan a. MZP member chawimawi tak te hi College Students’ Union Leader leh hnampual hruaitute mi 59 an ni.

1 thought on “Zophai buaina a Assam Police te’n MZP te bungraw halchhiat man hu rulhlet dan tur MZP in a ngaihtuah dawn”

Comments are closed.