Remna thuthlung in India, Mizoram leh MNF te a huam vek – Zoramthanga

Aizawl 2nd July, 2018 Thawhțanni

Zoram Today: July ni 2, thawhțanni Mizo Hnam Runah MNF chuan chhung inkhawm an nei a, he hunah hian Pu Zoramthanga, President chuan thusawiin, “India sorkar leh MNF-in 1986-ah Memorandum of Settlement an ziah chu India aiawh, Mizoram aiawh leh MNF aiawha sign a nih angin he remna thuthlung hian India, Mizoram leh MNF te a huam vek a, tumah tel lo bik leh huam loh bik a nei lo,” a ti a. “Kha remna thuthlungin a ken tel, State kan nihna leh inhung bikna kan neih (Special protection) te hi Mizo mipui zawng zawng ta leh huap vek a nih zia tichiangtu chu a ni,” a ti.

MNF President chuan mi ṭhenkhatin remna thuthlung sawinep an tumnaah, Remna thuthlung chuan India sorkar leh MNF-te chauh a huam tih an sawi fo tih a sawi a. “Remna thuthlung kha India mipui leh India sorkar aiawhin Union Home Secretary, RD Pradhan an ziakin, Mizoram mipui leh sorkar aiawhin Pu Lalkhama Chief Secretary-in a sign a, MNF aiawhin Pu Laldenga’n a sign bawk a ni. He remna thuthlung sign hian India sorkar, Mizo mipuite leh MNF a huam vek a, an aiawhsak mipuite aiawhin heng mi pathumte hian an sign a ni a, mimal anga sign an ni lo,” a ti bawk.

Pu Rama chuan, “Remna thuthlung sign avanga remna leh muanna lo awm ta te, development lokal zozai te leh remna thutlung avanga State kan lo nih taka inthlanah pawh, a chuh taima mate chu he thu sawitute hi an nih hi mawle,” a ti bawk.

MNF President chuan Mizoram hmun hrang hrangah MNF boruak a kang nasa hle tih a sawi a. “Lunglei lamah ZNP Sub-Hqrs elected President hlui Chawngthanmawia leh a hote tam tham takin tunhnaiah MNF an rawn zawm a. Saiha lamah mi lawk tak tak Pu S Hiato PS ṭhin Pu Chakhu telin lawmluh an ni bawk a. Zoram hmun hrang hrang leh Aizawl-ah pawh MNF-in nasa takin mi thar kan lawmlut zel a ni,” a ti.