Vawiin thawhțanni july ni 2, 2018-a ‘Bengvar Inkhawm’ ah thu sawiin Pu Ruata chuan “NLUP hi sawrkar programme a ni a, party mal thil a ni lova chuvangin sawrkarin awmze neiin sawrkar anihna angina a kalpui tur a ni. Chutiang anih lai chuan a dawngtu tur thlang turin MLA te an hmanga, MLA te an hmang pawh hi Dan ațanga en chuan a dik tawh lova, chumai ni lovin MLA pawh ni lo, engmah ni lo, 2013 inthlana an candidate tling zo lo, Pu H Liansailova, Dr Lalmalsawma, S Hiato leh Pi Tlangthanmawii te pali, anmahni tlin lohna bial theuhah NLUP dawngtu tur thlang tura an ruat phei hi chu engti kawng mah hian a dik thei lova, Dan kalh hulhual a ni a, heng hi Dan hmanga hrem theih a ni.
Hemi chungchang sawi a nih hnua Chief Minister in congress party ni lovin an sem ve tur a ni lo, NLUP sem duh chu congress ah lo lut mai rawh se tih ang zawnga tawngkam a nei te phei hi chu a dik lo hulhual a, hei hian he sawrkar hian mipui sawrkar anihna a hre tawh lova, party invulhna hlangin an kal a ni tih a lan tir a, hetiang anga an kal avang ringawt pawh hian sawrkar zel tlak an ni tawh lo,” a ti a.
“Hetianga an ti rau rau anih chuan an MLA tlinglo pahnih dang Pu K Lianzuala leh R Selthuama te hi enga tinge an thlantir ve law law loh, hei hian an party chhung buaizia a tilang chiang hleah ka ngai,” Pu Ruata chuan a ti bawk.
PRISM Party kan sawrkar hunah chuan hetianga party tih bik neih leh invulhna ang hi a awm ve lovang. Eng party mi leh sa pawh nise he ram leh hnam thatna duh apiang chu he ram siamtha tur hian kan thawh pui ang, Pu Ruata chuan a ti bawk.
PRISM chuan Kristianna hi a tha bik a ni tih lantir a, kan Pathian chawimawi tur te; kan chhehvel hnamte aia ropui zawk kan nih lantir tur te; Zohnahthlak (Zofa) te inpumkhatna atana kan unaute hipkhawm tur tein- Mizorama ram ralmuang, dik leh fel taka ro inrel, hna nei lo awm lohna, mi hrisel leh hlim chenna, ram hausa, hnam dangten tlawh an chak ram dinpui atan mi tin kan sawm che u, tiin an thuchhuah ah tarlan ani.