PM hlui Vajpayee a thi lo

Aizawl 15th June, 2018 Zirtawpni

ZORAM TODAY: Prime Minister hlui Atal Bihari Vajpayee chu vawiin chawhma lam khan thi angin social media ah a thang chiam mai a, India mipui tamtak thin a țhawng hman hial ani. Mahse, he thuthang hi thu belhchian dawl lo ani.

Vawiin thleng hian AIIMS damdawi In a ICU ah enkawl mek zel a la ni a, a dinhmun hi darkar tinin doctor te’n an endik zel.

Nimin June ni 14 a AIIMS Director Randeep Guleria sawi danin kum 93 mi Prime Minister hlui hi a dinhmun a țha chho zel niin a sawi a, hun reilo te hnuah  damdawi In chhuahsan thei khawpa a țhat chhuah leh an beisei thu a sawi bawk.

BJP hruaitu hlun Atal Bihari Vajpayee hi June ni 11 khan damdawi In ah dah luh ani a, a kal(kidney) țhatloh vang leh zunkawng lama harsatna a neih vang nia sawi ani.

Vajpayee hian zunthlum a nei a, a kal pakhat zawk chauh a țha a, kum 2009 khan stroke nantna vangin harsatna nasa tak a lo nei tawh bawk.

Damdawi In ah hian ram puma Political party hruaitu țhahnem takin an tlawh tawh a, Prime Minister Narendra Modi, PM hlui Manmohan Singh leh HD Deve Gowda bakah Congress President Rahul Gandhi leh midangte bakah Madhya Pradesh Chief Minister Shivraj Singh Chouhan, RSS general secretary Bhaiyyaji Joshi bakah Rajasthan CM Vasundhara Raje ten vawiin hian an tlawh leh bawk.