NHM hnuaia thawktu hrang hrangte harsatna sutkian dan tur an ngaihtuah

Aizawl 15th June, 2018 Zirtawpni

ZORAM TODAY: Mizoram State Health Society Executive Committee Meeting vawi 16-na chu vawiin khan Secretariat Conference Hall, Aizawl-ah neih a ni a. Meeting hi Chairman Pu Lalrinliana Fanai, IAS, Commisssioner & Secretary, Health  & Family Welfare-in a kaihruai a, Committee Member-te an kal tha hle.
Mizoram State Health Society Executive Committee Meeting-ah hian Agenda hrang hrang zingah National Health Mission hnuaia thawktu hrang hrangte harsatna sutkian dan tur sawiho a ni a. NHM Guidelines-in a sawi angin NHM hnuaia thawkte chu State sorkar hna lakah a remchan dan ang leh a theih ang anga duhsak nise tih pass a ni a. Nau neite tana ‘Maternity Leave’ chungchang pawh sawiho niin fa 2 nei chin tan State sorkarin Dan a siam sa chu hman tur leh sorkar hnathawk ten mamawh tawk ang zela an chanvote an hman thiam a tul thu an sawi bawk.
Heng bakah hian Programme Officer hrang hrangten an programme-a harsatna an neih leh programme an lo kalpui tawh dan te ngaihthlak a ni a; Chairman hovin a theih ang anga an harsatna tawh mekte sutkian dan tur pawh rel nghal a ni. Procurement bikah chuan sum leh pai renchem zawka hman a nih theih nan Directorate of Health Services leh Directorate of Hospital & Medical Education hnuaia NHM ve ve te chu inrawnkhawm se, rate bithliah fela hman ve ve ni bawk se tih leh Quality Control tha zawk a awm theih nan Cell hran din nise tih rawtna chu pawm niin bawhzui nghal turin an rel a. Common Procurement Cell bakah hrileng a lo awm palh emaw thulh a, hmalakna chak zawk leh felfai zawk a awm theih nan ‘Outbreak Emergency Purchase Board’ siam nise tih rawt a ni a, hei pawh hi bawhzui a, hmalak nghal tura dah a ni.
Chairman Pu Lalrinliana Fanai chuan tunlai ruahsur nasat leh thil dang avanga chhiatna hrang hrang thlengah leh thleng theiah Medical lama thawktute chu inralrin reng a ngaih thu sawiin, tun hnai tuilian avanga harsatna awm theiah pawh Health Department chuan hma a lak mek thu a sawi bawk.
Source: DIPR