Minister John Rotluangliana hausakna kum 5 chhungin nuai 969.23 in a pung : PRISM

Aizawl 09th June, 2018

ZORAM TODAY:  Nimin June ni 8 khan PRISM Party General Secretary Pu SL Ngursailova Sailo chuan PRISM Party office-ah PRISM Party ‘Phochhuah Beihpui’ kal zelah press mite kawmin, ram hruaitute zinga mi Minister John Rotluangliana hausakna chu kum 5 chhungin cheng nuai 969.23 in a pung hman niin a sawi.

Ngursailova Sailo chuan John Rotluangliana hi kum 1993, 2008 leh 2013-ah te MLA atan thlan tlin a ni, a ti a. “Kum 2008 MLA thlan khan a nupui leh a dependent te nena an thil neih chu : Pawisa Rs 11,36,948 (Nuai sawm pakhat singthum sangruk zakua sawmli pariat) Gypsy 2, In pakhat Rs 90,80,000/- (Nuai sawmkua singriat) man leh ram 4 a hlutna Rs 7,60,000 (Nuai sarih singruk) a ni a. A hausakna hlut zawng hi Rs 109,76,948 (Nuai za pakua, sing sarih sangruk zakua sawmli pariat) leh Gypsy 2 a ni. He termah hian Dy. Speaker a ni” a ti a.

“Kum 2013 inthlan khan Mamit Constituency-ah ding lehin a nupui leh a dependent te nena an thil neih chu : Pawisa Rs 72,27,000/- (Nuai sawmsarih pahnih singhnih sangsarih), Bolero, Alto, Bike-2, Ecavator-3 leh Scooty a ni a. A lirthei neih ho hlutna hi Rs 99,85,000/- (Nuai sawmkua pakua singriat sangnga) a ni. Thil dang Rs 1,99,000/- (Nuaikhat leh singkua sangkua) man hu a nei a. In pakhat Rs 4,65,00,000/- (Nuai zali sawmruk panga)  man a nei bawk a, ram pawh nasa takin a neih belh a, ram 10 lai neiin  Rs 4,40,00,000/- (Nuai zali sawmli) man lai a ni ta bawk. A hausakna hlutna hi Rs 10,79,11,000( Nuai sangkhat sawmsarih pakua) a ni,” a ti bawk.

“Pu John Rotluangliana Minister  hian MLA nih hi a hlawkpui ber awm mang e, tih theihin a hausa chak hle ani” tiin media hmaah PRISM Party General Secretary hian a sawi.

Ngursailova chuan “Tunah hian Mamitah a insak hmuh a ni a. PWD SOR-2013 anga chhut thuak thuakin a in sak hlut zawng hi cheng nuai 200 vel a ngaih theih a ni a. Kum 2013 inthlan hma a  cheng 72,27,000/- (Nuai sawmsarih pahnih singhnih sangsarih) nei siin engtin nge cheng nuai 200 man lai in hi a sak theih tih hi kan zawt a insawifiah turin kan phut a ni” an ti bawk.

PRISM Party chuan Sorkarah Dy. Speaker leh Minister ni chung si a heti taka a hausakna a pung thur thur mai hi rinhlelhawm kan ti a. Mipui hmaa a sum lakluh dan dik tak puang chhuak turin kan phut, an ti a.”A puang chhuak duh lo a nih chuan heti taka lo hausa thut hi Mipui sum eiru-ah kan ngai a, chhuichhuah a dan anga hrem a nih theih nan hma kan la dawn a ni” an ti.

1 thought on “Minister John Rotluangliana hausakna kum 5 chhungin nuai 969.23 in a pung : PRISM”

  1. Awi…. Engtinmah an tu ngam lovang….. Mi depde in an awh ruk tak an tih ve theih si loh takah an inhampuar ve mai mai a ni

Comments are closed.