Congress sorkarin a intiam ang ngeiin MURA thil phut tih hlawhtlinsak rawhse : Ex- MNA

Aizawl June 8th, 2018

ZORAM TODAY : Ex- Mizo National Army Association (Ex- MNA) chuan June 7 ningani khan thuchhuah siamin ram leh hnam tana an rawngbawlpui unau, MNF Uderground Returnees Association (MURA)te’n sorkara an thilphutte kum 10 dawn dawhthei taka an nghah thu sawiin “Sorkarin tihlawhtling tura an laka a lo intiam anga vawiin ni thlenga a la tihhlawhtlinsak theih loh avanga chawngheia nawr hial a lo ngai ta mai hi Ex-MNA Association chuan pawi a ti a, a lainat takzet ani” an ti.

Ex- MNA chuan kum lam pawha upa tawh takte, kum 60 chunglam an unaute’n chawngheia sorkar an nawr a ngai ta mai chu an taksa hriselna paw’n a tawrh phah thei tiin “An ngaihtuahawm kan ti a. Lo nghak tura sorkarin hun a tiam leh chhung pawha a la tihsak thei ta lo fova, hetianga chawngheia nawr hial a ngai ta mai hi vanduaithlak kan tihpui takzet a ni” tiin an thuchhuah ah tarlan ani.

Congress sorkar hian MURA laka a intiamna hrang hrangte, tuna an thilphutte tihlawhtling turin dawhkan khat kilpuia sawipuia vat turin kan ngenpui ani, tiin “Congress sorkar hian kan unau MURA-te hi politics-a an thlawpna ringawt hmang ṭangkai lo hian MURA-te thilphut tihlawhtling tura an lo intiam tawh ang ngeiin tihlawhtlinsak ngei rawh se” an ti bawk.