ADHOC status a hlankai phutin school pakua te’n ‘Demand Day’ an hmang

Aizawl June 8th, 2018

ZORAM TODAY: Mizoram Govt. Lumpsum Grant-In-Aid Higher Secondary School (MIGLAHSSA) pakua-te chuan Adhoc Status-a hlangkai tura sorkar an phut ani tih lantir nan nimin june ni 7 ațang khan ‘Demand Day’ an hmang a, zirtirtute pawhin zirlaite an zirlai an zirtir lo.

Thuchhuah an siamah MIGLAHSSA chuan khawtlang enkawl mek Higher Secondary School-te hi mamawhna a san em avanga khawtlang țangrualin kum 2004 leh a hma lama a din te an ni tiin, “Kum 14 chuang zet khawtlangin sum leh pai thawhkhawmin a lo enkawl tawh a ni” an ti a. Vawi engemaw zat sawrkar thuneitute hnenah dinhmun țha zawka dah ve tura an ngen pawhin sawrkar ațangin thu lawmawm an hmu ngailo niin an sawi bawk.

School pakhat zelin zirtirtu hlawh atan chauh pawh tun thlengin mipui thawh khawm cheng nuai 60 ațanga 80 vel țheuh an seng tawh niin an sawi a, “MIGLAHSSA chuan School Managing Board-te’n zirlaite hmakhua an ngaihtuah em em laia loh theih lohna avanga ‘Demand Day’ hman  hial angai ta hi pawi kan ti takzet ani”, an ti. Kum 14 chuang lai lo enkawl tawhtu khawtlang mipuite chu chhawk zangkhaia, heng School-te hi Adhoc Grant-In-Aid-a hlangkai ve hram tura sawrkar an ngen thu an tarlang a, Sorkar hmalakna thlir chunga a țul anga hmalak chhunzawm zel an tum thu an sawi bawk.

MIGLAHSSA-ah  hian   Phullen    HSS, Thingsulthliah, Tuisualral, Zobawk, Farkawn, N.E Khawdungsei, E. Lungdar, W.Phaileng leh Zawlnuam HSS-te an tel a; kumin HSSLC Exam-ah khan heng school pakua ațangin zirlai 435 exam-ah zirlai 422 lai an pass niin an sawi bawk.