MNF-in Lengteng biala mi thar 429 lawm lut

ZORAM TODAY: MNF General Headquarters Vice President Pu R. Tlanghmingthanga chuan May ni 28-29, 2018 khan Lengteng bial khaw thenkhat tlawhin, Saichal leh Chiahpui khuaah Political Training a hmanpui a, May ni 29, 2018-a Saichal Community Hall-a hun an hmannaah, “Mi tu pawh – mimal emaw, a huho a ni emaw Political Party hi din theih a ni a, chutih rualin Hnam (Nation) erawh chu duh duhin rawta din ve mai theih a ni lo. He hnam min dintuin min din chhan leh ni se min tih ang nihtir tura Pathian leh kan Ram tan titu awmchhun, he hnam hming chhala koh MIZO NATIONAL FRONT hi chu kan ram leh hnam din chhuahna tur a ni,” a ti.

Pu Tlanga chuan, “MNF hi Mizo (Zohnahthlak)-te tana din a nih angin chu Zohnahthlakte’na kan chenna, kan ram humhim tur leh enkawl tura Pathianin min dinsak a ni. He ram, he hnam din chhuah nan hian a chhunga chengte hian hnam thinlung kan put a ngai a, hnam thinlung hi chhiatpui tham, ralpui tham a tling a ni. MNF hi a din tirh atangin Party dang angin MNF Party zawmna fee a awm ve ngai lo va, Mizo-a piang tawh phawt chu MNF nihna kengtu kan nih avangin tu tan mah he pawlah hian inthlahrunna tur a awm lo,” a ti bawk.

He huna thusawitu dang, Pu L. Thangmawia, MNF General Secretary pawhin thu sawiin, “Congress unaute’n 2008 inthlan dawna an tlangaupui, NLUP kha a dawng tur chuan cheng 2 pea Congress nih a ngai a, SEDP ve thung erawh hi chu party intodelhna ni lovin Zofate kawng hrang hranga kan intodelhna tura chhungtin huap a ni. Mi tu pawhin hlawhtlin tuma eizawnna ngelnghet din a tum chuan a mil tawk ang zelin chhawmdawlna pek a ni ang,” a ti a, thusawitu dang, Pu Saikapthianga, MNF Adviser pawhin, “Lengteng bialtu Pu Rohluna hi mi khawngaihthlak tak a ni; he biala a tlin theihna tura nasa taka ka puih thin leh ka lo kaihruai thin a ni a, chhungkaw sorkarna hnuaia Minister-a a awm hi, a bial tan tih duh leh ngaih pawimawh tam tak a nei ve a, chutiang ti thei miah lova rahbeh Minister a ni hi a lainatawm takzet a ni. Lainatin khawngaih viau mah ila, engmah a tih theih chuan si loh chuan bial chhunga khaw hrang hrang hmasawn nan hian thlak mai hi a hun ta niin ka hria,” a ti bawk a ni.

MNF thuchhuahin a tarlan danin, Chiahpui-a hun hmannaah hian mi thar voters 211 lawm luh niin bawng leh vawk talh a ni a; Saichal-ah hun hmannaah mi thar voters 218 lawm luh niin lawi talhin ruai buatsaih a ni bawk.