Mizoram NGO-te’n Tuikuk vote thlak chungchangah ECI hotute an hmu

ZORAM TODAY: Nimin May ni 29, 2018 (Thawhlehni) chawhma dar 11:00 khan NGO COORDINATION COMMITTEE, Mizoram chuan kum 2018 MLA Election-a Bru raltlante vote thlak dan tur chungchangah Election Commission of India (ECI) hotupa O.P. Rawat, Chief Election Commissioner (CEC) chu an hmu a; CEC rual hian Sunil Arora, Election Commissioner leh official member 4 an tel a; NGO Coordination Committee-te hi Chairman Pu Vanlalruata, CYMA President hovin, Dr. Thanpuii, MHIP Finance Secretary, Pu L. Ramdinliana Renthlei, MZP  President leh Pu RB. Lalmalsawma, MSU President te an ni.

NGO Coordination Committee-te hian Chief Election Commissioner (CEC) hnenah hian memorandum an thehlut a, ECI hotute nen hian minute 20 bawr vel meeting an nei. He meeting-ah hian Mizoram NGO te chuan Tuikuk chungchang an buaipui rei tawh thu te, hei bak chu Election Commission lam dawr tura an kal tawh dawn loh thu te, state pawna vote an thlak leh dawn a nih chuan nasa taka an dodal tur thu te, NGO Coordination Committee-in state pawna Tuikuk hovin an vote thlak an remtih dawn tawh loh thu te leh Mizorama lut lova vote an thlak a nih chuan Mizote tan pawh a zahthlak dawn tawh thu te an sawi a. Tuikuk (Bru) hruaitute chu an naute chhawmdawlna hmanga an hausak thu leh lirthei tha tha an neih thu an sawi chuan O.P. Rawat, CEC a barakhaih hle niin kan thu lakna chuan a tarlang.

Hei bakah hian ECI lamin kum 2014-a ziaka an lo intiam ang ngeia Mizoram pawna Tuikuk (Bru)-te vote an thlak loh nana hma la turin an ngen a, CEC hian NGO Coordination Committee thu thlente chu ngai pawimawha, lo ngaihtuah an tum thu a sawi a ni.

HETAH hian NGO Coordination Committee-te memorandum thehluh chu dah a ni e.