Mizoram Governor thar lakluh a ni

ZORAM TODAY: Mizoram Governor thar atana ruat Pu Kummanam Rajasekharan chu nimin, May ni 29, 2018 (Thawhlehni) chawhma dar 11:30 khan Raj Bhavan Durbar Hall-ah rinawmna thu tiamtira lakluh a ni. Governor lakluhna inkhawmah hian Chief Secretary Pu Arvind Ray chuan President Pu Ram Nath Kovind-a’n, Pu Kummanam Rajasekharan, Mizoram Governor atana a ruatna lehkha Warrant of Appointment a chhiar chhuah hnuin Gauhati High Court Chief Justice Pu Ajit Singh chuan rinawmna thu tiamtirin Pu Kummanam Rajesekharan chu Mizoram Governor atan lakluh a ni.
 
Governor thar lakluhna inkhawmah hian Chief Minister Pu Lal Thanhawla, Assembly Speaker Pu Hiphei, Minister, Deputy Speaker leh MLA te, Chief Minister hlui Pu Zoramthanga bakah sawrkar mi pawimawh thahnem tak an tel.  

Pu Kummanam Rajasekharan hi Mizoram Governor ni turin nimin chawhma dar 10:30-ah Thuampui Helipad a lo thleng a. Chief Minister Pu Lal Thanhawla bakah Chief Secretary, DGP, Secretary to Governor, Aizawl DC leh sawrkar mi pawimawh dangte’n an lo hmuak a ni.

Nimina rinawmna thu tiam tirna neih zawhah Mizoram Governor thar chuan Mizoram mipuite chibai bukin, kawng tinrenga hmasawnna a ngaihpawimawh hmasak ber thu a sawi a ni.