ZORAM TODAY: Vawiin May Ni 28, 2018 khan ZPM Tangrual Pawl chhung inkhawm neihnaah Pu Vanlalhlana, MPC Vice President chuan state hrang hrang Chief Minister dinhmun sawiin, “Naveen Panaik, Manik Sarkar, Pawan Chamling, Nitish Kumar leh Narendra Modi te hian an state hmasawnna theihtawp an chhuah a, Super Chief Minister tiin an sawi thin. Chutih laiin Madu Koda, Shibu Soren, M. Karunadhi, J. Jayalalitha leh Laloo Parsad Yadav te erawh hmingchhe takin hun an hmang a ni. ZPM CM candidate hian CM hmingtha, Super CM tia kan sawi ho ang hi neih kan tum a ni,” a ti.
Pu Hlana chuan, ei leh bar a intodelh a tul thu sawiin, “Kut hnathawktute kan khai chhuak dawn a. Tunah chuan Mizoramin buhfai a mamawh thla thum daih pawh kan la thar chhuak thei lo va, tui leh êng (power) kan mamawhna a sang tawlh tawlh te hi en liam mai mai a har tawh hle a. Pu Hawla leh Pu Zorama hian ram hmasawnna atan hna an thawk duh tak tak lo va. An hun remchang neih pawh an hmang tangkai thiam lo va. ZPM kan sawrkar chuan an tih duh loh tha zawng zawng hi kan ti vek ang,” a ti bawk.
Thusawitu dang Upa FP Laikhama chuan, “Corruption a zung nena phawi leh phoro tum hian a sir an hlep ngam tawk a ni. Mahni rilru lo lutuka khawsa hi a khamawm tawh takzet a ni. Thil tha hi mite tihah dah lovin mahni tihah i dah theuh ang u,” a ti bawk. Vawiin ZPM chhung inkhawm hi Rev. Darchungnunga’n a kaihruai a ni.