Zu zawrh a tawp theih nan Presbyterian kohhran an țawngțai rual dawn

Aizawl May 27th, Pathianni

ZORAM TODAY:  Kum  2017  Synod Inkhawpuiin “Kum  2018  MLA election puala ram pum huapa țawngțai rual neih leh kan rama zu leh ruihhlo hluar lutuk a lo reh theih nana ram pumhuap țawngțai rual neih”  a rel tawh angin zanin May ni 27, 2018  Pathianni  zan  hian   hemi  puala țawngțai  rualna  Mizoram  Presbyterian kohhran  zawng zawng te’n  an hmang dawn.

Heti hian țawngțai thupui an siam:

Zu leh ruihhlo chungchangah-

1. Kohhran duhloh kan rama zu zawrh a tawp theih nan.
2. Zu leh ruihhlo ti țhinte thlarau chhanchhuahna changa an sim theih nan.

3. Zu leh ruihhlo dova YMA hmalakna a hlawhtlin zel theih nan.

4. Zu leh ruihhlo ngaite enkawlna home hrang hranga thawktu zawng zawngte tan.

5. Zu leh ruihhlo zuar țhin te’n Pathian duhloh zawng sual nasa tak ani tih leh ram leh hnam pawi sawina rapthlak tan ani tih hriaa an sim theih nan.

2018 MLA election lo awm tur chungchangah-

1. Inthlanna fel, thianghlim leh dik tak kalpui anih theih nan.

2. Diklo taka sum sen, vote lei leh hralh a awmloh nan.

3. Ram hruaitu atana țha ber țheuh bial tinah kan thlan chhuah ngei theih nan.

4. Party tinin ram leh hnam tana hruaitu țha leh tling, ram hmangaihtu leh mi diktak an candidate ngei theih nan.

5. Inthlanna fel fai leh dik a awm theih nana hma latu MPF- General headquarters, Constituency Forum leh Local Forum a mawhphurtu zawng zawngte tan.