Vawiina chhiatna thleng hrang hrangte

ZORAM TODAY: Vawiin, May ni 27, 2018 (Pathianni) hian Zoram pumah accident hrang hrang a tam hle a, chungte chu a hlawmin han dah ta mai ila.
8:20 AM : Nupa thi
Pu C. Zorelliana, kum 52 chu Serchhip damdawiinah a boral a, vui tura buatsaih mek a nih laiin a nupui Pi Lalrinliani, kum 65 mi chu chawhnu lam dar 1 vel khan a boral ve leh. Pu Zorelliana hi nimin khan damdawiinah admit a ni a, a nupui awmpuiin nizan lam khan a awm nuam lo tan ve chauh a ni. An pahnih hian vawiin tlai dar 5-ah a ruala vui an ni (Accident a ni chiah lo na a, thil thleng khat tak a nih avangin kan han dah tel a ni).

2:00 PM : Current man
Aizawl Tlangnuam Block vengah, Lalhmangaiha s/o Zarzova, kum 20 mi chu electric-in a man a, Aizawl Civil Hospital ICU-ah enkawl mek a ni. Lalhmangaiha hi an thiannu birthday lawmnaah an thianhovin ei an siam a, chawhnu an inkhawm hman tak lohvah chuan Tlangnuam Block Venga SIPMIU tuizem chungah thla la turin an chho va. Tuizem chung atanga hnai taka electric hrui uai fual chuan Lalhmangaiha hi manin vanduaina a tawk ta a ni.

4:30 PM : Tuitla
Bungkawn Venglai tlangval, kum 22 mi Samuel Lalchhanhima chu Reiek kai, Tlawng lei thlangah a tla a, a ruang zawn mek a ni. Samuela leh a thiante hi vawiin khan a thiante nen Tlawng Reiek kaiah an leng khawthawng a, Samuela hi chesual palhin tuiah a tla ta a ni. Nizan dar 8 velah khan, Sunhluchhip ram chhung, Tuirial lui, Awle Li an tihah Tv. Kennedy-a, kum 36 mi chu tuiah a lo tlahlum tawh bawk.

5:00 PM : Truck chil
Aizawl Dawrpui Veng, Canteen Kualah scooter leh truck (ke 12 nei) a intai palh a, Scooter-a chuang hmeichhe tleirawl kum 14 mi, Laura Lalhmingsangi, Nursery Veng chu truck hian chilin ka pawh chhawn lovin a boral. Laura Lalhmingsangi hi Lalmalsawma Memorial School-a Class-VI zirlai a ni.
8:00 PM : Tukverh ațanga tla hlum
Vairengte Venglai tlangval, Lalfakzuala, kum 27 mi chu an tukverh atanga chesual palhin a tla a, ka pawh chhawn lovin a boral.

10:30 PM : Motor accident

Kawnpui Darnam kawngah NAYAK Company Haiiva ke 10 nei a chesual a, mi 3 chuang zingah Pu Lalbiakmawia, Luimawi khua chu motor-in delh betin a boral. Motor-a chuang zingah David-a’n hliam a tuar thung. Lalbiakmawia ruang hi he thu buatsaih lai hian lak chhuah tum mek a ni.