ZPM thuchhuah belhchian dawl lovah puh

ZORAM TODAY: Aizawl South-II MNF Block Secretary (i/c E/Roll) Pu Lalhunliana chuan, May ni 26, 2018-a Vanglaini chanchinbua lo lang, ZPM zawmtu Pu Malsawmzuala, Mission Veng chu Mission Veng MNF Unit President a nih loh thu a sawi.
Pu Malsawmzuala
Pu Lalhunliana’n a tarlan danin, Aizawl South-II MNF Block huam chhungah hian Mission Veng North leh South Unit hrang ve vea awmin Mission Veng South Unit President ni lai mek chu Pu C. Lalnunmawia a ni a, Mission Veng North Unit President ni lai chu Tv. P.C. Lalnuntluanga a nih thu sawiin, MNF Unit President tang lai ZPM zawm an awm loh thu a sawi a ni.

MNF General Headquarters leh Aizawl South-II Block MNF hnuaiah hian Mission Veng MNF Unit hi din a ni lo va, ZPM-in Mission Veng MNF Unit President ni lai lawm lut anga an insawi hi mipui bum tumna leh MNF mipuite tihchiai tumna a nih thu Pu Lalhunliana hian a tarlang.

ZORAM TODAY-in kan lo tarlan tawh angin, tun kar Zirtawpni, May ni 25, 2018 khan ZPM thuchhuah chuan ZPM chhung inkhawmah Pu Malsawmzuala, MNF Mission Veng Unit President, Mission Veng Branch KTP Leader ni bawkin ZPM a zawm thu an lo tarlang tawh a ni.