Aizawl Pa pakhat chungah Pang Zirlai Pawl an lungawi lo

ZORAM TODAY: Pang Zirlai Pawl (PZP) Jt.Headquarters, Aizawl chuan zirtawpni May ni 25 hian thuchhuah  siamin zirna leh chhungkaw harsatna vangin Vațhuampui nula Lalnunfeli chu Aizawl ah inhlawhna tur zawng a a kal thu an sawi a. Aizawla a thlenna nu in hnathawh tur lo zawn sakin chanchinbu a ‘awmpui tur duh’ tih chu a biak sak, tih an sawi.

Aizawl Zotlang venga khawsa Pu Lalțhuamluaia Sailo te In ah inhlawhna hmuin May ni 14, 2018 tlai dar 4 ah a lut niin an thuchhuah ah an tarlang a, zan khat chauh a riah hnuah hrehawm a tih thu leh a awmna pa in a hauh nasat chungchang Aizawla a innghahna thlen In nu hnenah a thlen tih sawiin, nakinah nuam a la tih mai tur thu leh hreawm tawrh hram hram a ngaih thu țha taka hrilhin a lo hnem tih an tarlang.

Vațhuampui nula hian hrehawm taka awm ai chuan tiin a awmna In ațanga hmun danga insawn a tum a, chu chu Pu ber chuan phal lovin step ah a hnuk chiam a; Lalnunfeli chuan hlau in a room ah a tlân lut a, a inkalh khum hnuah a room ațanga chhuahna awm ah chuan chhuakin an țhenawm a hmelhriat loh te In ah a tlân lut a; a hnu-ah an chhungkua in Lalnunfeli awmna room ah kalin Pu Lalțhuamluaia Sailo chuan khum bula awm chu a sam ah kek in a hnuk tlu bawk a, chu mai bakah a thawmhnaw leh a mobile phone te a hrensak vek, tiin PZP thuchhuah chuan a tarlang.

Pang Zirlai Pawl chuan an zirlai pui Lalnunfeli chunga mawilo taka diriama hmusittu Pu Lalțhuamluaia Sailo chet dan chu hriatthiam har  tiin ringtu tih atan chuan mak kan ti takzet ani, an ti a, a thuamhnaw leh phone kawlsak pawh a rang lama pe vat tura an duh thu sawiin Lalnunfeli chunga thleng ang hi tute chungahmah thleng nawn lo turin PZP chuan kan duh takzet an ti.