State Commission for Protection of Child Rights in jail chhunga naupangte enkawl dan endik

ZORAM TODAY: Mizoram State Commission for Protection of Child Rights (MSCPCR) chuan vawiin khan jail chhunga naupangte enkawlna pek dan tha thawkhat mahse, hmasawnna tur leh tih ngai erawh thahnem tak a la awm tih an hmu chhuak.

 Central Jail ah hian tun dinhmunah nu in an fa an tan pui naupang 4 an awm mek a, Supreme Court chuan Civil Writ Petition pakhat a ngaihtuahnaah jail-a naupang awm mek ten nunphung, hriselna leh zirna lama naupang dangte ang bawka hma an sawn theihna tura hmala turin State sawrkar tin a hriattir a, jail-a tang naupai mek te a bika enkawlna pe tur te, nau neih dawnah jail atanga an chhuah lailawk theih dan tur ruahman tur te, naupang tan an mamawh chaw tha a hranga pe tur te, nausen chaw siamna tur bungbel mamawh chhawpchhuah sak tur te, naupang hri danna tha taka pe tur te, nau awmna tur leh lehkha an zirna tur nursery ruahman tur te leh naupawm tana pindan hran siamsak tur te in Supreme Court chuan thupek a siam a, naupang kum 6 tling tawh chin jail-a awm tir pawh a khap a ni.

 Hetiang tehna hrang hrangah hian Central Jail dinhmun chu a tha thawkhat niin MSCPCR Chairperson Pi Sangzuali Vanchhawng chuan a sawi a, “Hetihlai hian naupang te tan a bika eitur chaw tha pek a la ni lo leh nausenin an nu te ei ang apiang an țawm ve mai chungchangah a rang thei bera hmalak thuai a țul”, ani ati.

Sangzuali Vanchhawng chuan “Naupang leh annu te tana room hran awm lo leh tang dangte nena a huhova dahkhawm vek an ni chu naupang rilru thanlenna kawnga thil țhalo thlen thei tu a nih ani”, a ti a, a hranga an awm theih dan tur ngaihtuah thuai a tul thu a sawi  bawk.

Hetihlai hian faina leh thianghlimna kawnga Central Jail enkawltute hmalakna chu a  fakawm hle an ti a, vawiina Central Jail endiktu MSCPCR Chairperson hi member dang Dr. Julie Remsangpuii Fambawl, Pu J Malsawmzuala Vanchhawng leh Pi K Malsawmzuali bakah Case Worker Pi Varthanpuii Varte leh Outreach Social Worker Pu C Lalduhawma ten an țawiawm a ni.