India Vice President Venkaiah Naidu langin Aizawl a rawn kal

ZORAM TODAY: India Vice President Pu M.Venkaiah Naidu chuan vawiin khan langin Mizoram a rawn tlawh.

 Mizoram University Campus, Tanhril-a sak zawh thar ‘Academic & Seminar Complex’ a rawn hawngin, hemi rual hian UGC leh NEC bultuma Boys & Girls Hostel sakna tur lungphum a phum nghal bawk.

Vice President Pu M.Venkaiah Naidu hi Lengpui Airport-ah a tum hmasa ber a, hetah hian Commerce & Industries Minister Pu H.Rohluna hovin state officials pawimawh engemawzatin an lo hmuak a. MZU hmunah hian Vice President Pu Naidu hi Mizoram Governor Lt.Gen.Nirbhay Sharma, PVSM, UYSM, AVSM, VSM (Rtd), Mizoram Finance & Planning Minister Pu Lalsawta bakah Mizoram Chief Secretary Pu Arvind Ray, DGP Pu Balaji Srivastava leh state officials pawimawh dangte’n an țawiawm a ni.

MZU Academic & Seminar Complex hawnna inkhawm MZU Auditorium-a neihah
Khuallian India Vice President Pu M.Venkaiah Naidu chuan thu sawiin “Mizoram-ah zirna țha zawk nei tur chuan infrastructure tha neih a pawimawh em em a, chuvangin vawiina Academic & Seminar Complex building thar ka rawn hawng thei hi a lawmawm hle a ni”,  a ti.

 Mizoram chu state ralmuang berte zinga mi a nih angin hmasawnna pawh nasa takin a thleng mek a, Mizo mipuite pawh ziak leh chhiar thiamnaah an sang ang bawkin hmasawnna lamah pawh an pen chak hle a ni, a ti a, “Khawvel pumah India-ah chiah hian ramchhunga cheng mipui zinga zaa 65% chu kum 35 hnuai lam an ni a, mithiam ten an chhut danah chuan kum 2030-ah phei chuan India chuan ‘surplus talent’ nei awmchhun ram a nih hial an ring a; chuvangin vawiina zirlai thalaiten an zirna lamah pawh degree hrang hrang bakah chhawr theiha an thiamnate an tihhriam a ngai chho zel dawn a ni”, a ti.

Vice President chuan Mizoram University chu hun reilote chhungin hmingthatna a chher mek a, Mizoram tan mai ni lovin North East Region bakah ASEAN ramte atanga zirlai tam thei ang ber hip thei tura tan la turin a fuih bawk.

Pu Naidu chuan Mizoram leilung, thing leh mau, boruak, sik leh sa te chu duhthusama mawi leh nuam a nih thu sawiin “Environment humhalh hi a pawimawh a, chumi rual chuan mahni hnam ziarang leh hnam tawng humhalh  a pawimawh hle bawk a ni”, tiin zirlai kalkhawmte a hrilh a. Mizoram-ah chuan horticulture, floriculture leh food processing lamah hmalak tam a, entrepreneurship lam pawh thalaiten an awn tan ve a ngai tawh a; tunlai khawvelah IT tel lovin engmah a tihtheih tawh loh avangin digital lamah pawh tan la sauh sauh turin zirlaite a fuih bawk.

Mizoram Governor Pu Nirbhay Sharma pawhin thu sawiin tuna India Vice President ni mek Pu M.Venkaiah Naidu taihmakna a fak a, state 2 tih loh chu ramchhung state dangte a tlawh kim vek tawh thu a tarlang a. Governor chuan Mizoram ziak leh chhiar thiam 93% a nih laiin hnathawk zat (employment) erawh 24% vel chauh a ni thung a, hemi avang hian zirna kalpui a nih dan hi thlirnawn a pawimawh hlea a hriat thu a sawi a. Mizo zirlaite chu mahni tawng bakah tawng dang, a bik takin Hindi, thiam tel ngei ngei turin a chah bawk.

 MZU ațangin Thuampui helipad panin vawiin chawhnu vek khan Aizawl a chhuahsan nghal. Țhuampui helipad-ah hian Mizoram Governor, Finance Minister, Mizoram Chief Secretary, Mizoram DGP leh state officials pawimawh dangte bakah Central YMA, Mizo Hmeichhia Insuihkhawm Pawl, Mizoram Kohhran Hruaitute Committee leh Mizoram Upa Pawl hruaituten Vice President hi lo chibaiin an thlah liam.

(Picture : Alfred Vanchhawng , DDK )

1 thought on “India Vice President Venkaiah Naidu langin Aizawl a rawn kal”

Comments are closed.