Power Dept in Zuangtui to Serchhip 132kV line chungchang a sawifiah

ZORAM TODAY : Power & Electricity department chuan kum danga kan lo inhmakhua thin angin Zuangtui to Serchhip 132kV Line chu ni 18.5.2018 (Zirtawpni) khan Shutdown lain Line Check hnathawh a ni a. Tluang taka hna hi zo nia kan inhriat laiin tlai lamah Power Supply dan pangngai angin pek leh tur a ni a. Amaherawhchu, vanduai thlak takin power supply hi pek theih a ni ta hauh lo mai a. Hemi ni atang hian a chhan hmuhchhuah tumin chhun zan zawma hnathawh nghal niin, bialtu Serchhip Division mai bakah Aizawl, Lunglei leh Champhai lam atangte in hnathawktu intirin theitawp chhuah a ngawrh taka bawhzui zel ani , an ti.

Hemi avang hian nasa takin power supply a khaihlak a. A bik takin Mizoram chhim lamah Serchhip District, Lunglei District, Lawngtlai District, Saiha District te leh Aizawl District-a Chhingchhip Sub-Station atanga Power pek ten nasa takin Power Supply-ah harsatna an tawk a. Power & Electricity Department chuan ‘pawi a tiin mipuite hriatthiamna a ngen tak meuh a, theitawp chhuahin hma lak chhunzawm zel a ni tih mipuiten min hriatpui turin kan ngen ani , tiin thuchhuah an siam.