Minister John Rotluangliana’n IOC ah gas harsatna thlen

ZORAM TODAY : May ni 23 khan FCS&CA Minister Pu John Rotluangliana chuan Gas (LPG)  harsatna chungchanga Mizoram dinhmun IOC hotute a sawi pui.

 Minister John Rotluangliana chuan LPG bikah Mizoram tan distributor an tlem thu a tarlang a, a bikin Aizawl khawpui ah chuan Distributor 12 chauh an awm a hei hian mipuite mamawh a phuhru zolo ani , tiin IOC hotute chu distributor tamzawk an awm theihnan hma la turin a hrilh tih sorkar thuchhuah ah tarlan ani.

IOC hotute chuan Minister thusawi chu an bawhzui tur thu sawiin tun dinhmunah pawh Durtlang ah LPG distributor tur chu dan angin an thlan tawh thu leh physical/site verification an neih mek thu an sawi a, Sialsuk ah chuan Godown tur sak zawh a nih tep tawh thu tarlangin Bairabi leh Kawlbem ah pawh kut thlak tan theih tep anih thu an sawi bawk a, Lawngtlai a Distributor thlanna tur advertisement  tichhuah tep anih thu an tarlang bawk.

IOC hotute chuan Mizorama LPG supply hnianghnar zawka a awm theih nan tan an lak thu sawiin May ni 22 khan Borkhola atangin LPG phur Truck Trip 13 leh Mualkhang atangin Truck Trip 11 Mizoram tan thawnchhuah a nih thu an tarlang a ni.

Meeting ah hian FCS&CA Minister bakah Pi Saizikpuii, Dy Resident Commissioner Mizoram House Silchar; Pu Alok Dutta, Chief Divisional Retail Sales Manager; Pu N N Singh, Chief Manager LPG; Pu Suman Biswas Asst Manager Retail Sales; Pu Martin Gangte, Sales Officer LPG Sales leh FCS&CA Official an tel a ni.