Er.Rinawma MLA in Sialhau zirlaite a fuih

ZORAM TODAY : Thawhlehni May ni 22 , 2018 khan Mizo zirlai Pawl (MZP) Sialhau Branch chuan Sialhau Community Hall-a an khaw zirlai ti ṭhate chawimawina hun an nei a, bialtu MLA Er. Lalrinawma, MNYF President ni bawk chu khuallian ah an hmang.

Khuallian Er.Rinawma chuan Sialhau MZP te’n zirlai tiṭhate chawimawina hun an nei chuan khawtlang hmasawnna a thlen ngei a rin thu a sawi a, “Kan nu leh pate’n an neih zawng zawng zirna ṭha kan dawn theih nan kan tan an hlan a. Vawiinah hian an theihna zawng zawng kan tana hlantu kan nu lah pate hi zah let ila, hmasawnna duhawm tak an neih theih nan kan nu leh pate hi i ṭanpui let ang u. Kan zirna atana pawimawh em em nunchang ṭha leh thuawih theihna hi kan zirnaah pawimawh ber a nih avangin mahni inthununin nungchang mawi i nunpui tlat ang u,” tiin zirlai kalkhawmte a fuih ani.

MLA chuan, “Ngaihhlut tur dik kan ngaihhlut thiam hi a pawimawh hle. Zirlaite’n hlawhtlinna duhawm tak in neih zel theih nan tum mumal leh fel tak in neih a ngai a, kan chenna leh awmna hmun hian kan ngaihtuahna tibuai suh se. Mahni inrintawkna te, dawhtheihna te, tumruhna te nen taima takin hmalam i pan zel ang u,” a ti bawk.

He hun hman hi Lalramnunsanga, Sialhau Branch MZP President-in a kaihruai a, Pu Lalremruata Chhangte MNYF Vice President chuan career awareness chungchangah zirlaite hriattur pawimawh sawina a nei bawk a, National Bavery Award, 2017 dawngtu Sialhau rawlthar hnenah Sialhau MZP ten an chawimawina thuziak a hlan bawk a , NGO hrang hrang hruaitute’n thu an sawi bawk a ni.