MNF-in district puan pathumte tihpuitlin tum

ZORAM TODAY: Ni 22.05.2018 (Thawhlehni) khan MNF Sr.Vice President Pu Tawnluia chuan Khawzawl Zaingen Veng YMA Hall-ah MZP Headquarters Khawzawl-ten HSSLC Pass lawmpuina an neih programme chu khuallian niin a hmanpui a, pass tharte hnenah lawmman a sem nghal a ni.

Khuallian Pu Tawnluia chuan thu sawiin, “Vawiina zirnaa hlawhtlinna ropui tak changtute hi kan chhuang takzet che u a. Tumruhna te, dikna leh rinawmnate hi vawng zel ang che u. Miten, ‘enge mawi i tih ber?’ min tih chuan ‘school naupang uniform ha chunga bag aka sikul kal tur leh sikul bang inzui dul dul hi a ni’ ka ti ṭhin. Mizoramin Hnam Zalenna a sual lai khan Khawzawl khua hian thapui a lo chhuah tawh a. Khawzawl hi India sipaiten an hal darh vek a, min um darh vek a ni. 1986-a remna a lo awm khan, remna thuthlung avanga lo hawte kha a khua ang zawng chuan khaw khatah kan tam ber a ni. Zirlaite u, Mizoram tihmingṭhatuah lo ṭangin, Mizo Nationalism champion pui ngei turin lo par chhuak zel ang che u. Kan sorkar lai khan Khawzawl tichangkang turin hma hrang hrang kan la a, IR Batallion kan dah a, heta thawk mi 1000 zette hlawh hi Khawzawl Bazarah a  luang liam a ni. Khawzawl hi District puitlingin awm se la, tiin kan sorkar lai khan Notification kan chhuah a. Congress sorkar thar khan hemi ruala District thar kan puante nen khan tihpuitlin a tum lo a, a enkawl zui duh lo hi pawi kan ti hle a. Pathian leh mipui zarah MNF kan sorkar chuan Khawzawl leh District-a kan lo puan tawhte kha kan tipuitling dawn a ni,” a ti.

Pu Lalruatkima MLA pawhin thu sawiin, “Khawzawl khuain khawtlang ṭangruala in lo enkawl Higher Secondary School kan nei hi a lawmawm ka ti hle a, Arts stream-ah 100% pass kan han nei theite hi a ropui hle a ni. Khawtlang enkawl sorkar school-in kum khata ṭanpuina cheng nuaikhat vel chauh Lump Sum Adhoc Grant-in-aid dawnga school kan enkawl hi khawtlang tan phurrit a nih avangin sorkar hian an ko chhawk zansak a hun tawh takzet a ni. Khawtlang leh Zirlaite hian kan am leh hnam a him zel theih nan kan ngaihtuahna kan sen tel ve reng pawh hi  a pawimawh hlein ka hria a, Congress sorkar hi tun thlenga Cachar-Mizoram ramri (Inner Line Reserve Forest 509 sq.km) dik pawh hre lo an nite hi a vanduaithlak hle a. Mizoram State Boundary Committee chu Pu C.Chawngkunga Ex-Minister Chairman-na hnuaiah 12/4/2011 khan din tawh a nih laiin;  nimin maiah Innner Line Reserve Forest zirchiang tur ‘Core Committee’ an din leh ta mai kha Boundary Committee rin tawk lohna nge ? Political appointment pe a, a hming maia mawhphurhna sorkarin a lo chelhtir zawk avangin, hma an lo la lo hrim hrim ni ang tih ngaihtuah tham a awm a. Mizoram ramri buaiah hian Mizote kan ṭanrual a tul tak meuh a ni,” a ti.

He hun hi MNF Gen.Hqrs.leh MZP Gen.Hqrs.aṭangin mi engemaw zat hruaituin an hmanpui a. Pu Andrew Lalramnghaka Fanai, Fin. Secy. MZP Gen. Hqrs. leh Joint VC aiawh ṭheuhte’n thusawina hun an hmang bawk.