MZP bultumin Citizenship Amendment Bill, 2016 duh lohna lantir a ni

Vawiin May 21 khan NESO leh MZP ṭangkawpin Citizenship Amendment bill, 2016 duh loh lantirna (Sit-in Protest) Vanapa Hall kawtah an nei.
He hun hi Pu B. Vanlaltana, Vice President-in kaihruai a, Pu Lalnunmawia Pautu, General Secretary-in report pein, Tv. Ricky Lalbiakmawia, NESO Finance Secretary leh Tv. L. Ramdinliana Renthei, MZP President-te’n thu an sawi a ni.
L. Ramdinliana Renthlei, President MZP chuan, “Tunlai India ramin a buaipui ber pakhat chu The Citizenship (Amendment) Bill, 2016 hi a ni a. Citizenship (Amendment) Bill, 2016 hian India khua leh tui zawng zawng a nghawng avangin ngun zawka kan ngaihtuah a ṭul hle a ni. The Citizenship (Amendment) Bill 2016 hi pawm a nih chuan Afghanistan, Bangladesh leh Pakistan atanga India-a lo lut heng – Hindu, Sikh, Buddhist, Jain, Parsi emaw Christian emaw te chu tun hma anga mana jail-a khunga thawn haw tur ni tawh lovin kum 6 chhung India-ah an lo awm tawh a nih chuan India khua leh tui nihna pek tawh zawk tur an ni. Sakhaw behchhana Citizen nih theihna tur Bill a ni ber awm e. Hei hi Mizoram tan chuan a him lo lehzual a ni. Mizoramah pawh NGO Coordination kaihhruaina hnuaiah All Political party leh Joint NGO pawhin duh lohna lantir a ni tawh a, hemi chungchangah hian memorandum inang tlang thehluh a ni tawh nghe nghe a ni. NGO anga kan hmalakna hi a tawk ta lo hle niin a hriat a, a sorkar anga hma kan lak a ngai ta niin a lang a ni. Mizoram State Legislative Assembly-ah te hian kan rorel khawl kan MLA te hian pass thei se chuan a duhawm hle ang a, kan dodalna pawh hian awmzia a neih lehzual hi ka ring tlat a ni. State Legislative Assembly-a pass turin kan MLA rual te kan ngen nghal bawk a ni,” a ti.
MZP President chuan, “May ni 10, 2018 khan Citizenship Amendment bill, 2016 zir chiangtu tura din Joint Parliamentary Committee on Citizenship Amendment bill, 2016 chuan North East state an rawn tlawh a, NGO anga Delhi-a hmuh an nih khan Mizoram min lo tlawh ve tura sawm a ni a, North East an lo kal ṭuma Mizoram min lo tlawh ve lo hi kan hrethiam lo hle a. Mizoram tlawh lova The Citizenship Amendment bill, 2016 hi pass a nih chuan India sorkar hian Mizoram hi India ram bung pakhatah min pawm lovah kan ngai dawn a ni.  Chuvangin Mizo ṭhalaite hian kan tih tur kan hria a, kan tih tur kan ti ve mai dawn a ni. Citizenship Amendment bill, 2016 pass a nih loh nan hian Mizo mipuite’n theihtawp kan chhuah ho a ngai a, tumah inpuh tawn lovin kan zavaiin i ṭangrual zel ang u,” a ti bawk.
Thusawitu dang Tv. Ricky Lalbiakmawia, NESO Finance Seceretary chuan, “Citizenship Amendment Bill 2106 NESO-in an duh loh chhan hrang hrangte chu he Bill hi hman a nih chuan Afghanistan, Pakistan leh Bangladesh aṭanga Minority-te’n India khua leh tui nihna an nei thei dawn a, hei hi NESO chuan a duh lo takzet a. North East State hrang hrangte hi a tuar ber tur kan nih avangin kan duh lo takzet a, a tawp thlengin he Bill hi kan do dawn a ni. Tin, vawiin hian North East  State hmun hrang hrangah he Bill duh lohna lantirna hi neih a ni. He dan tharah hian Citizenship Act, 1955 hnuaia India khua leh tui nih theihna dan awm sa chu siam ṭhat tum niin Hindu, Sikhs, Buddhist, Jain, Parsis leh Kristian sakhua tu pawh Afghanistan, Bangladesh leh Pakistan-te aṭanga India rama kum 6 awm tawh tu pawh khua leh tui nihna dil chu pek thei a ni dawn a, chu vang chuan NESO chuan he Bill hi a duh lo takzet a, a tawp thlengin a do zel dawn a ni,” a ti.
Vawiin NESO leh MZP-in a buatsaih The Citizenship Amendment bill, 2016 duh lohna Sit-In Protest-ah hian MZP hruaitute leh zirlai ṭhahnem tak an tel  a ni.