Joint Verification Team-a Mizoram aiawhte leh CM an meeting

ZORAM TODAY: Vawiin chawhnu khan Inner Line Reserve Forest (ILRF) chhunga Mizoram leh Assam inrina felfai tawk lo leh innekna awm dante thlithlaia enfiahtu Joint Verification Team-a Mizoram aiawha kalte chuan Chief Minister Pu Lal Thanhawla leh Home Minister Pu R. Lalzirliana hovin CM Cabinet Meeting Room-ah meeting an nei.
Joint Survey neih hma hian Assam leh Mizoram aiawhte chuan April ni 9 khan Dholai-ah hmalak ho dan tur an sawiho tawh a, chutah chuan survey neihna hmun tur te sawiho hmasak niin April ni 12 khan Zophai ațangin Joint Survey hi neih țan a ni. April ni 21 khan Silchar Airport-ah Pu Satyendra Garg, Joint Secretary (NE), MoHA hovin team pahnihte hian meeting an nei leh a, survey neih chhunzawm zel dan tur sawiho leh niin, hmalak zawm theih dan tur option chhawpchhuah te chu Mizoram Home Department-in pawm awm a tih leh tih loh ngaihtuah leh tur a tih a ni thung.
Vawiin meeting-ah hian chipchiar zawka state pahnih inrina zir chiang tur core committee din ni se tih a ni a, he core committee hian a tih tur bawhzui nghalin a hma thei ang bera report thehlut se an ti bawk.
Meeting-ah hian Pu Lalram Thanga, Principal Secretary to CM & PCCF; Pu Lalnunmawia Chuaungo, Principal Secretary, Home Deptt.; Pu Lalbiakzama, Addl. Secretary, Home Deptt. leh Joint Survey Mizoram Team atangin an leader Pu Lalthlamuana Pachuau, CO(CC), Pu Lalnunzira, DFO Kolasib leh MZP President Pu L. Ramdinliana Renthlei leh Vice President Pu B. Vanlaltana te an tel a ni.
Joint Survey-ah hian Mizoram Team-ah Conservator of Forests, Central Circle chu leader niin, Commanding Officer IR Battalion; DFO Kolasib; ASO Kolasib; SDO (C) Bairabi; President MZP (emaw a aiawh); Jt. VC President Bairabi leh Jt. VC President Vairengte te chu member an ni a. Enfiahnaah hian Home Department aiawh an tel bawk a ni.