ZORAM TODAY | November 17-30, 2015
Kumin, 2015 June thla khan kum 2015-2016 chhunga Aizawl khawpui chhunga parking fee khawnna tur area hrang hrang contractor tur mi 58 thlan an ni a, heng zinga mi 22 chu a chhâng sáng ber ni lo chunga thlan an ni a; ZORAM TODAY-in a chhâng sáng ber ni lo contractor-te area thenkhata parking fee khawn dan a zir chiannaah, parking fee hi sawrkar aiin contractor-te kutah a lut tam fe a ni tih a hmu chhuak.
Parking Tender Terms & Condition Serial No. 9-ah chuan ‘A chhang sang ber emaw, a hniam ber emaw kher thlan tur a ni lo va, a thlangtuin thlan âwma a hriat a thlang thei ang’ tih a awm a, hei hi terms & condition siamtute’n siam theihna nei mah se, tender chhuahtute leh thlangtute hian an duh duh lak theihna chance an nei sáng hle tih a hriat a, he rules & regulation tlawhchhan hian contractor 22 lai chu a chhâng sáng ber ni lo chunga thlan an ni ta a ni. Parking fee tender form hi Rs. 50 man niin form 376 hralh chhuah a ni.
Aizawl Municipal Council hian May ni 11, 2012 atang khan Transport Department atangin Control of Parking and Collection of Parking Fee thuneihna chu an chang a, June ni 1, 2012 atanga parking fee khawn tanin June ni 30, 2015 thlengin parking fee atang hian Rs. 77,27,345 hmuh chhuah a ni tawh. Aizawl khawpui chhung parking area hi category hrang hrangah then a ni a; a pawimawh ber Category-A chu:-
Category-A (+Hot Zone)
i. Bawngkawn Durtlang Road Traffic Point atanga Kulikawn Tlangnuam junction thleng, Ramhlun leh Upper Bazar Dawrpui kaltlangin.
ii. Bawngkawn Durtlang Road Traffic Point atanga Chanmari thleng, Chaltlang kaltlangin.
iii. Chanmari atanga Israel Point thleng, Lower Zarkawt kaltlangin.
iv. Sikulpuikawn atanga Zodin thleng, Temple Square, Khatla leh Tennis Court kaltlangin.
v. Temple Square atanga Vaivakawn thleng, Dawrpui Vengthar kaltlangin,
vi. Bazar Bungkawn Traffic Point atanga Sakawrpului Traffic Point thleng, Saron Veng kaltlangin.
vii. Treasury Square Traffic Point atanga Sikulpuikawn thleng, Upper Republic kaltlangin.
Chhang sang ber ni lo contractor an lak mi 22-te
Parking fee hi category thum — A, B leh C-ah then niin, Category-A ah hian Hot Zone (hmun lûn bik) a awm leh a, lirthei dah man pawh a sáng bik a ni. A chunga tarlan contractor-te area-ah hian Category-A a awm nual a, chungte chu — Sl No. 2-Laltlanzauva, Sl No. 3-Lalthlamuana, Sl No. 5-Kapliansangi, Sl No. 6-Lalrinawma, Sl No. 8-Vanengmawia, Sl No. 9-Vanlalthara, Sl No. 10-Lalengzama, Sl No. 11-Melvin Vanlalhlimpuia, Sl No. 12-Lalrinawma, Sl No. 13-Lalhmingthanga Royte, Sl No. 15-Lianthuama, Sl No. 17-Reuben Vanlalhruaia, Sl No. 18-Lalchawiliana leh Sl No. 19-Raymond Zorammawia te area a ni hlawm a, Category-A ah hian Hot Zone a awm nual bawk. Tin, Category-B area huamtu hi mi 5 an awm bawk a ni.
AMC-in parking contractor tur an lak hian, tender chhangtute hian thla tina sawrkara an chhun luh inhuam zatin an chhang a, dan naranin a chhang sang berte lak tur ni awm tak an ni a; nimahsela, a chhang sang ber ni lem lo lak an awm nual a, heng zingah hian induhsakna avanga lak an awm nia sawi a ni nghe nghe.
Heng contractor 22 zinga a chhang sang zual contractor 4-te area chu ZORAM TODAY chuan a zir chiang a, sawrkara an chhun luh letin hlawkna an hmu a, parking fee collector-te erawh chuan an thawh hah aiin hlep an hmu chhe hle a ni tih hmuh chhuah a ni.
Chhang sang ber ni lo, contractor lak zinga pakhat, Melvin Vanlalhlimpuia hian cheng 35,000-in a chhang a, Dawrpui Biak In atanga Bazar Bungkawn inkar hi a area a ni a; parking zone hi Hotel Floria bul bakah Israel Point-a ACBOA Point hnung leh Dawrpui SBI Branch bul a ni.
Hotel Floria bula parking collector hian contractor hnenah nitin cheng 2,000 a chhûng lut a, chu chu thla khat (ni 26)-ah chuan cheng 52,000 a ni. He collector hian, contractor share cheng 2,000 a hmuh loh changin contractor-in a hriatthiam thin thu a sawi.
ACBOA Point hnunga parking collector hian contractor hnenah nitin cheng 1,500 a chhung lut a, chu chu thla khat (ni 26)-ah cheng 39,000 a ni.
Bara Bazar phei, Dawrpui SBI kawt vela collector hian contractor hnenah nitin cheng 1,500 a chhung lut a, chu chu thla khat (ni 26)-ah cheng 39,000 a ni. Heng collector pahnihte hian a tlangpuiin ni khatah cheng 200-300 vel an hlawh pha ve thin a, office chawlh leh ruahsur ni-ah an chawi belh thin bawk.
Tichuan, helai parking contractor Melvin Vanlalhlimpuia hian thla tin collector pathumte hnen atangin cheng 1,30,000 a dawng a, thla tina sawrkar hnena a chhun luh hi cheng 35,000 niin a bak zawng cheng 95,000 zet chu a hlep tihna a ni a, chu chu sawrkara a chhun luh aiin a let 2.71-in a tam zawk.
Parking contractor chhang sang ber ni lo lak zinga pakhat, Vanlalthara hian cheng 30,100-in a chhang a, a area chu Zodin a ni; Zodin-ah hian Parking Zone hmun 5— AR kual, Zodin Brigde bul, SBI kawt, Laipui hnuai leh Dental Plaza kawt te a ni.
AR kual collector hian contractor hnenah nitin cheng 1,200 a chhung lut thin a, cheng 300 vel hlawh pha vein chawi belh chang a nei bawk. Zodin bridge hnuaia collector hian nitin cheng 150-200 chu contractor hnenah a chhung lut thin bawk a, inrinni leh ni danga a chhun luh a inang lo. Heng collector pahnihte’n contractor hnena an chhun luh hi cheng 1,350 vel niin thla khat (ni 26)-ah cheng 35,100 a ni.
SBI kawta collector hian nitin cheng 2,650 chhung lutin laipui hnuai collector hian cheng 1,200 leh Dental Plaza kawt collector hian cheng 900-950 a chhung lut a; contractor hian nitin cheng 4,750 a dawng tihna a ni a; chu chu thla khat (ni 26)-ah cheng 1,23,500 a ni. Collector-te hian chawi belh chang an nei a, lammuala hun pawimawh a awm changin hlep an nei tha hle niin an sawi bawk.
Tichuan, Vanlalthara hian thla tin cheng 1,58,600 dawngin sawrkarah cheng 30,100 a chhung lut a, cheng 1,28,500 a hlêp a; chu chu sawrkara a chhun luh aiin a let 4.26-in a tam zawk a ni.
Chhang sang ber ni lo lak zinga contractor pakhat Vanengmawia hian cheng 20,000-in a chhang a, Vanapa Hall kawt leh Treasury Square vel hi a area a ni.
Vanapa Hall kawta parking collector hian nitin cheng 1,000 chu contractor hnenah a thehlut thin a, Vanapa Hall-a function a awma a kawt reserve changin cheng 2,500 a thehlut thin. Chawi belh chang a nei a, reserve a awm changin cheng 1,000 a hlep ve thin. Thla khat (ni 26)-a contractor hnena a chhun luh hi (reserve tiam lohvin) cheng 26,000 a ni.
Treasury Square-a parking collector hian nitin cheng 2,200 chu contractor hnenah a chhung lut thin a, a tlangpuiin ni khatah cheng 300 vel a hlawh pha a, cheng 1,000 thleng chawi belh chang a nei bawk. Thla khat (ni 26)-a contractor hnena a chhun luh chu cheng 57,200 a ni.
Helai area contractor Vanengmawia hian collector-te hnen atangin thla tin a tlem berah cheng 83,200 a dawng a, sawrkara a chhun luh cheng 20,000 bak, cheng 63,200 a hlêp a ni. Chu chu sawrkara a chhun luh aiin a let 3.16-in a tam zawk.
Chhang sang ber ni lo lak zinga contractor pakhat Lalthlamuana hian cheng 18,100-in a chhang a, a area chu Mission Veng bazar atanga Sikulpuikawn a ni.
Sikulpuikawn (New Street thla vel) collector hian nitin cheng 1,300 chu contractor hnenah a thehlut a, cheng 500 hlawh phak chang neiin, chutiang vel tho chawi belh chang a nei bawk niin a sawi. Thla khat (ni 26)-a a chhun luh hi cheng 33,800 a ni.
Mission Veng bazar collector hian nitin cheng 1,300 tho chu contractor hnenah a thehlut thin a, sikul chawlh chang hian a chawi belh ziah a; a hlep that deuh changin a chawi belhna bâ rulh nan a hmang thin niin a sawi. Thla khat (ni 26)-a a chhun luh zat chu cheng 33,800 a ni.
Lalthlamuana’n collector pahnihte hnen atanga thla tina a dawn zat chu cheng 67,600 niin, sawrkara a chhun luh cheng 18,100 bak, cheng 49,500 a hlep a; chu chu sawrkara a chhun luh aiin a let 2.73-in a tam zawk.
Collector-te hian dar 7:30am-6:30pm chhungin parking fee an khawn a, Pathianni tih lohvah chuan chawlh an nei lo a ni.
