Mizo Idol zinga naupang ber Rebecca Zorintluangi

  • Editor 
  • Uncategorised
ZORAM TODAY | September 15-5 October, 2015
Khatia Mizo Idol a ni ta chu, chanchinbu lama a kawmna tihchhuah tumin ZORAM TODAY chuan Rebecca Zorintluangi chu kan hêl char char a. A buai vanglai tak a nih avangin hun remchang hmuh a har hle. PUC Girls Hostel-a awm a ni a, hostel-a a luh veleh a hun remchan neih um zuiin, PUC Principal Dr. Tawnenga kan bia a, ani’n hun remchang min siamsak thei hlauh va, kan lawm hle. September ni 10, 2015 zan dar 6:30-ah chuan, Editor, News Editor leh Joint Editor bakah kan photographer William Lalrindika te nen Senhri Devotion Hall-ah Mizo Idol hmachhawnin kan thu thap a. Hei hi kan inkawmna chu a ni.


Zai tan hun…
Kum 4 mi ka nihin Beginner Department-ah ka lo zai tawh thin.
Ka lawmman lak hmasak ber chu, kum 2008 khan Skylink buatsaih Little ZoStar-ah khan ka tel a, palina ka ni.

Mizo idol show neih chhunga chetchhiatna
Pheikhawk sang hi ka bun ngai lo va, top 10 intihsiakna kan neih zan khan ka bun a. Ka zai laiin ka inpal deuh nawk nawk a, chu chu ka chetchhiatna a ni deuh mai.

Idol show neih chhunga chhinchhiah tlak i tih…
Tun dinhmun hi ka thlen ka inring lo lutuk a. Top 20 te kan han thleng a, hlate kha kan zir luai luai a. Final te kan han thleng pha a, pahnih teh tlawng khan kan zir ta a. Top 20 kan tlin tirh lai kha keimahah chuan a thi thei lo.
 
Sawmna hi…
Ka dawng nual a, mahse, internal test a hnaih avangin duh angin ka tihlawhtling thei rih lo. Hostel-a ka awm avang hian harsatna a awm lutuk chuang lo va; principal te, warden te hian min tuipui a, mi hriatthiamna a ngah a, ka lawm khawp mai.

Idol hmasawnna tur…
Kan judge-te hi an tha ka ti a. Kumin idol neih lai hian hla zirna hun kan nei tlem em em a, kan hah a, kan zo hma rêng bawk a. An buatsaih leh hunah chuan tlemin hla zirna hun hi pe tam deuh thei sela tih chu keima duhdan a ni.

Zirna a tibuai em?
Mizo idol hian ka zirna a tibuai hran lo. Keimahah chuan zirna hi a pawimawh zawk a, pawimawh lutuk te chu a lo awm a, chutiang a nih loh chuan class hi thulh ka tum tawh rih lo. Chutih rual chuan zai hi thlahthlam ka tum chuang lo va, a theih chin chinah chuan zai zel ka tum. Gospel ka sa zel ang.

I idol hnu hostel i luh tirha i thiante lo dawnsawn dan che…
Hostel ka luh khan min lo chibai a, min lawmpui thu te min hrilh a. An lo tang lutuk a, min lo tawngtaipui nasa bawk a. An lo ri chel chul a ni ber.

Principal leh zirtirtu dangte, department leh SU hruaitute atangin lawmpuina ka dawng nasa hle a, a hmunah pawh min tawiawm thin. Tin, idol ka nih khan teachers’ day-ah te khan lawmpuina banner an tar a, a nuam ka tiin phu lo ka inti hle.

I nunah Mizo idol zia engtin nge i lantir ang?
A hmasa berah chuan Pathian hriat a pawimawh ka ti a, tawngtai tam hi tha ka ti bawk. Chuan, idol nih hian keimahah chuan danglamna vak a awm lo; mi hriat kan hlawh avangin kan indah sáng tur a ni lo va, amaherawhchu, mi hriat kan nih avangin kan nun kan uluk a ngai ka ti. Tin, thiante zingah pawh min lo be ngam lote an awm thei a, chungte pawh chu keimahni zawkin kan va biak bawrh bawrh a ngai.

Hobby…
Zai tih lohvah chuan lehkhabu chhiar hi nuam ka ti a, Tinkle hi ka chhiar nasa hle.
 
Future plan…
Ka naupan têt te atang tawha ka châk chu teaching lama kal a ni a, tun thleng pawhin ka kal tum a la ni reng bawk a, thil dang lutuk hi ka aim lo.

Thil tawn hrehawm…
Programme neihna velah hian rui te hi an lo awm thin a; chungte chuan min lo pawh buai chang a awm thin a, chu bakah khawlai chhuahnaah pawh âwm lo lutuka inpawh te a awm thin a. Chungah te chuan tlema han hnial chuan ‘i va induh ve’ min ti thin a, chungah chuan chhan ngaihna a awm lo thei khawp mai a. Chungah chuan keimahah tlema inzir a la ngai ka ti.

I vei zawng…
Tunlai harhna hi ka sawisel lo nain, mimal nun hi pawimawh ka ti. A phawvuakah kan ral ang tih a hlauhawm. Tin, kohhran kan inthliar lutuk hi tha ka ti lo. Kei ngei pawh hi Presbyterian kohhran ni mah ila, tunah hian Baptist kohhranah ka inkhawm tam zawk a ni.

Lawmthu…
Pathian hnenah lawmthu ka sawi a, ka engkima ka engkim a ni. Ka chhungte min tawiawmna bakah ka hosteller-puite, PUC family min tawimawmna leh min phurpuina zawng zawngah ka lawm tawp. Sairang khawtlang bakah Zarkawt veng mipuite chungah, a bikin Zarkawt-a ka nu u chungah ka lawm takzet. Tin, Mizo mipui min lo tantu zawng zawng chungah lawmthu ka sawi a ni.

Mizo idol ni tawh zazwng zawnga naupang ber Rebecca Zorintluangi Pu Thangchungnunga leh Pi Lalrindiki te fa upa ber niin kum 1996 October ni 27-ah a piang a, unau pali an ni a, hmeichhia pahnih leh mipa pahnih an ni. Sairang Sihhmui tui liak a ni a, Govt. High School, Sairang-ah HSLC zovin Staines Memorial School, Chanmari-ah HSSLC a zo bawk. Tunah hian PUC Girls Hostel, Senhri-ah a awm mek a, Pachhunga University College-ah 3rd Semester BA (Education) a zir mek a ni.q
—————
Idol contestant-a i kawmngeih ber…
Rachel-i ka ngaina ber.
I idol ve thung…
Zoramchhani hi zai lamah chuan ka idol a ni.
Music instrument…
Guitar ka perh thiam a, khuang a ni leh mai… hehe..
Zirtirtu ngainat...
PUC-a kan zirtirtuah chuan Sir Sabito hi fel ka ti a, ka ngaina ber.
Chhas lam…
Chhas ka nei lo. (..eh!)
————-
Fav. Singer    : Pensy & Carrie Underwood
Fav. Colour  : Pink
Fav. Dish       : Mizo bai
Fav. Music   : Pop & Country
BFF                  : Lalfamkima, Sairang
Facebook ID : Rebecca Zorintluangi Selate   

1 thought on “Mizo Idol zinga naupang ber Rebecca Zorintluangi”

Comments are closed.