Zirlaite harsatna thlentu online scholarship

ZORAM TODAY | August 17-31,  2015

Zirlaite’n school leh college atangin scholarship application form an la chhuak a, document tul ang angte thil telin hun reilote hnuah an thehlut nghal a; krismas dawna scholarship sem chhuah kha an nghak mai thin a, zirlaite tan chuan a nuam dangdai ve riau. Tunah chuan scholarship hi a chiri a, dawn hunbi pawh a awm hleithei ta lo. A dil dan thlengin zirlaite’n harsatna an tâwk chho mek.
August ni 4, 2015 khan Mizoram Scholarship Board hotute chuan an Secretary Pu J.H. Zoremthanga hovin Mizoram College Teacher Assocation, Mizo Zirlai Pawl, Mizo Students’ Union te nen scholarship chungchangah meeting an nei a, MSB Secretary Pu J.H. Zoremthanga chuan, “National Scholarship Portal hmanga online-a scholarship application tih vek a ngaih tawh dawn avangin internet communication that mumal lohna keini ramah chuan zirlaite’n harsatna an tawk nasa dawn a, a sut kian dan tur pawh kawng hrang hrangin kan ngaihtuah mek a ni,” tiin a sawi. “Hetianga online-a scholarship dil a ngaih tawh avangin scholarship diltu zirlaite chuan anmahni (individual) bank account diktak an hman ngei ngei a ngai tawh a, institution bank account leh nu leh pate bank account pawh hman a rem tawh lo,” tiin a sawi bawk.
Narendra Modi kaihhruai NDA sawrkar chuan tun session thar atangin scholarship scheme hrang hranga hman turin Direct Benefit Transfer (DBT) a ruahman thar a, scholarship diltu zirlai chuan online-in computer atangin dilna a chhu lut thlap tawh ang a, engkim tihfel a nih chuan Mizoram Scholarship Board-in an lo check fel ang a, National Scholarship Portal-ah an pe thla ang a; tum danga MSB kaltlanga scholarship hmuh thin ang kha ni tawh lovin, pawisa kha mahni account heuhvah Central atangin direct-in a rawn thun tawh dawn a ni.
Hei hi Mizoram internet speed muannaah harsatna tam tak a awm nghal a, thingtlang sikulte mai bakah khawpuia awmte pawhin harsatna an tawk nasa hle niin a lang. “Zirlaite mai bakah nu leh pa thahnem tak chu kan office-ah an harsatnate sawiin an rawn lenglut a, internet a muan thin avangin ‘login’ theih loh chang kan nei a, ZENICS lamin internet hman min phalsak chungin ni khatah pahnih thum vel bak online application kan fill up theih lo va, scholarship dil zirlaite an hrilh a hai thin khawp mai,” tiin MZP General Secretary L. Ramdinliana Renthlei chuan a sawi. Online-a application thawn hian document upload ngai a awm nual avangin hei hi internet speed muang takah thil tih chak a harsa hle.
Mizoram Scholarship Board hian zirlaite harsatna chu sutkiansak tumin theihtawp a chhuah mek a. Zirlaite tan pawh ruahmanna siamin, Higher Secondary chin chung lam chuan tun hmaa an lo tih thin dan ang thovin, paper-a format siam sa angin application dilna an thehlut ang a, zirlaite’n document dah tel ngai zawng zawng an neih kim hnuah MSB-ah submit lehin, anni’n an lo tihfel hnuah excel format leh zirlaite bank account nen National Scholarship Portal-ah an thehlut ve leh dawn a ni. Hetianga ti tur hian August thla chhung chauh zirlaite an nghak dawn a, hemi huna ti ve hman lo chuan online-a anmahnia an inbuaipui a ngai ve tawh thung dawn a ni. Minority Scholarship online application thehluh tawp ni chu Central lamin July 31, 2015 kha an bituk chin a ni a, amaherawhchu, hemi chhunga form thehlut hman lo an tam avangin Mizoram Scholarship Board hotute chuan hun pawt sei turin Central Ministry an ngên a, Central lam chuan August 31, 2015 thleng dilna hun a pawt sei a ni.
Nikum hmasa 2013-2014 academic session khan Minority Scholarship dil Mizo zirlai 5000 chuang an awm a, nikum 2014-2015 khan online hmanga application fill up tura an tih tak avangin zirlai 300 chauhvin online-in Minority Scholarship hi an dil niin Mizoram Scholarship Board hotute chuan an sawi. Class XI leh a chung lam zirlaite tana dil theih Post Matric Tribal Scholarship dilna turah pawh kumin aangin online application hmangin dilna hi thehluh ve tawh tur a ni a, kum hmasa lama Post Matric Tribal Scholarship dawng, Mizo zirlai 1,50,000 dawn atangin zirlai sang eng emaw zat chuan he dan thar hnuaiah hian harsatna an tawh ngei rin a ni bawk.
Central sawrkar ruahmanna siam thar scholarship scheme hrang hrangah hian ‘Digital India’ programme kalpuiin Direct Benefit Transfer hi an ruahman a, 20% pawh a hlawhtling a nih chuan thil lawmawm tak a ni ang, tiin Central sawrkar hotute’n an sawi a. Tribal Ministry hnuaia scholarship chungchang meeting, tun hnaia Delhi-a neihah North East state hrang hrang aiawhte chuan, internet communication that mumal lohna North East state-a hetiang hman a ni leh Post Matric Tribal Scholarship-a 10% state matching share awmte avang hian Narendra Modi-a kaihhruai NDA sawrkarin keini hmarchhak state-te a hrêknaah kan ngai, tiin an sawi hlawm.
Tunah hian man chawia online hmanga scholarship dilna fill up-sak thei internet cafe hrang hrangte chu an lûn hle a, form pakhat fill up man hi a tlangpuiin Rs. 100 atanga Rs. 200 thlengin an la a ni. Chuti chung chuan internet speed a muan avangin nikhatah mi pali panga vel bak chu heng dawr neitute hian an tihsak thei chuang lo va, zirlai thahnem tak chuan huntiam chhungin scholarship dilna an ti fel ve hman dawn lo niin a lang. National Scholarship Portal hmanga online-a scholarship dil a ngaih tawh avangin Aizawl khawpui chu sawi loh, khawpui dang leh thingtlanga zirlai, internet hman ve theih lohna hmuna scholarship dil turte’n harsatna an tawk nasa viau dawn a, scholarship dil pawh kum dang aiin nasa taka an tlakhniam rin a ni.
Ministry of Tribal Affairs khuan scholarship kalphung an her danglam nasa a, notification/order chiang tak chhuah si lovin kaldan hrang hrang an her danglam a, tuna kan kalphung pawh hi an thlak danglam leh thut lo vang tih a sawi theih loh niin MSB hotute chuan an sawi.
Kum 2014-2015 session chhung khan Ministry of Tribal Affairs-in Post Matric Tribal Scholarship an pek dan phung an thlak danglam a, academic session hman mek laiin scholarship diltu zirlai chuan bank account neih ngei ngei tur an ti thut a, document zawng zawng submit fel vek hnuah bank account number an thehluhtir leh chûk chûk a, zirlai thenkhat phei chuan nu leh pa leh unaute bank account an ring a, institution bank account-te pawh an thehlut bawk. Scholarship hmu si, vawiin thlenga pawisa thunna tur bank account MSB office-a la hrilh miah lo zirlai eng emaw zat an la awm nghe nghe.
“Chawpchilh taka kalphung a inthlak thut avangin buaina kan tawk nasa a, zirlaite bank account hrang hrangah scholarship pawisa hi thun nawn a tam hle tih kan hria a, pawisa rawn kir leh turin zirlaite kan ngên leh mek a, heng pawisa thun nawnte hi belhkhawmin Rs. 18,00,000 (18 lakhs) vel lai niin kan chhut. Zirlaite’n an rawn kir duh tawh lo na chungin an bank account atangin kan check nawn leh a, thìn chhuah kan tum mek a ni,” MSB hotute chuan an ti.
Post Matric Tribal Scholarship hi nikum 2014 khan 2nd installment bikah central sawrkarin 10% state matching share a rawn ti thut a, kan buai hle a nih kha. Kuminah erawh 100% central share tura Central budget-ah pawh pass a nih tawh laiin 10% state maching share a ngai leh dawn nia thu dawn a ni a, nikuma zirlai thahnem takin harsatna an tawh ang kha kumin hian an tawk leh lo vang tih sawi theih a ni lo.
_____________

THINGTLANG ZIRLAITE’N HARSATNA TAWK NASA

Central sawrkarin online-a scholarship dilna thehluh vek tur a tih avangin thingtlang lam zirlaite’n harsatna an tawk nasa zual bik hlein a hriat a, tun thleng hian scholarship form fill up hleithei lovin an la buai mek a ni. Sikul thenkhat chu an sikul thuneitute leh zirtirtute’n an buaipui a, zirlai ngah deuh sikul henkhatah chuan zirlaite’n anmahni an inbuaipui thung. Zirlai thenkhat chuan man chawiin midang an tihtir a, bank account hawnna leh form fill up-tir nan Rs.400 vel zel an sêng a, thingtlang lam tân chuan a hautak hle.

“Internet-a tih tur a nih avangin naupang an buai nasa a, internet an access vek theih loh avangin an buai hle a ni,” tiin Pu Muantea, Baptist HSS principal chuan a sawi. “Zirlai an tam avangin sikul aanga tihsak vek theih an ni lo,” tiin a sawi bawk. An zirlaite anmahniin an inbuaipui a ni.

Presbyterian English School, East Lungdar zirtirtu Pu Engnghilhlova chuan, “Website an khawih danglam zing lutuk hi kan buaina a ni,” tiin a sawi thung. “Bank account-ah kan la buai mek a; Mizoram Rural Bank account hmang zirlai tam tak an awm a, SBI account awlsam taka a tih theih laiin MRB account hmang ho hi a dik thei lo va, kan buai hle a ni,” a ti bawk. Anni hian an zirlaite an buaipui thung.

Harsatna tawh dan a inang lo hle. “Kan khaw high school hi ka register-na a rei tawh lutuk. Ka tih nawn dawn pawhin ‘already exist’ a ti tawh a, mahse, an la rawn approve thei lo,” tiin Pu Billy-a, Govt. Democratic High School, Khumtung-a zirtirtu chuan a sawi. Website hi an update reng avangin a danglam zel a, mi tam takin harsatna an tawh phah ta a ni.

Tunah hian online-a form fill up-na scholarships.gov.in-a registration ti hi zirlai mi nuai 4 chuang awmin, application form submit tawh hi mi nuai 1 chuang an awm tawh bawk.