July thla tawp lama Myanmar rama tuilian chuan ziaawm lam a pan zel a, he thu buatsaih lai thleng hian tuilian hian in 27959 tichhiain mi nuai khat chuangin harsatna an tawk mek a, thi leh hliam zat hriat chian theih a ni lo. Myanmar chuan khawvel ram hrang hrangte chu tanpui turin a ngên a, he thu buatsaih lai hian USA, India, China leh Australia ram chuan tanpuina sum an thawh tawh a; khawvel ram hrang hrang atangin Chin pawl leh kohhran tam tak chuan tanpuina an thawn tawh a ni.
He tuilian hi July kar thumna atanga intan a ni a; July ni 23 atanga zantin maia ruah baw tlawrh tlawrh chuan tui a tilian nasa hle a, Chin Hill atanga tuilian luangthla leh Meitei run atanga luang khawm zawng zawng chu Chindwin tuipuiah a infawk khawm vek avangin a kuangah a liam a, Kalaywa atanga Chikung leh Kalaymyo phei tluan thlengin tui a let chho va. Kum danga tui lian ang lo deuhvin Sabereka Khuangkaih ang maia rangin leilet leh khaw thenkhat chu a chim pup pup mai niin Zalianthanga, Tahan chuan a sawi.
He tuilian hian zual zel panin Kalaymyo City Hall chu a chîm a, lungin thlengin a chim zel a. August ni 1 khan Kawlpui damdawiin chhawng hnuai ber a chim pil tan tawh a, he damdawiin kawt Kalaywa panna kawng chho pawh mel khat zen zawn a chim leh a, hemi ni hian Kawlpui bazar pawh a chim pil titih nghal bawk. Lan-Sung atanga chhim lam hla lo tê atangin tui a tling tan a, sawrkar bank phei chu a zatve tuiin a tuam hlup hlup mai a ni.
Tuilian thut avang hian mi tam tak chuan an in leh lo an tlansan a, a thenin lawngleng hmangin sahimna an zawng a, nunau an tap a, bungruate nen ran nen an buai nuai nuai a; chutih laiin mi tlawmngaite pawhin tanpui ngaite tanpuiin theihtawp an chhuah nghal bawk. He tuilian avang hian Tamu, Kalaywa leh Natchaung inkalpawhnaah tui a cham pút a, electric ban pawh a lang che che thei chauh a ni. Tui hian khaw tam tak chu mipuite inring hman lovin a chîm thut zel a, mi tam tak chu khawvel a tawp dawn taa ngaiin an phili buai hle.
Khawthlang lam atanga tuilian chuan Tahan leh a chhehvelah kum danga an la tawn ngai loh harsatna nasa tak a rawn thlen a, lei tichimin khawlaiah khup chen tui dai tur a awm nghal a. July ni 28 khan Tahan naupang, Lalrinchhana, kum 8 mi chu tuilianin lain ni 4 hnuah a ruang chu Nanzalu khuaah an hmu chauh a ni. Ani hi tuilian avanga Tahan mi thi hmasa ber a ni. Hetianga chhiatna a thlen rual hian bazarah thil man a to nghal a, artui pum khat pawh Kyat 300 man lai niin Jessica Lallianpuii, Blossom Ministry dintu chuan a sawi.
Tahan-ah hian August ni 1 atangin ruahsur a hân a, tuilian avanga awmna tlansan Kawl mi (Burmese) 4000 chuang lai mai chu Tahan Hall, sikul, biak in leh in hrang hrangah an inkulh a, mi thahnemngaite’n ei leh in an pe thin a ni. Mizo khua Tuivar pawhin an tuar hle a, an khaw mawnga sangha dil leh leilet zawng zawng deuhthaw chu tuilianin a chimpil nghal vek a, Taphah khua pawh chimpilin Setaw Oo khaw zatve aia tam a chim nghal bawk. Khaw inkalpawhna zawng zawng tuiin a chim a, lei (bridge) pawh tuiin a lak zel avangin harsatna an tawk nasa hle. Tuilen vanglai takin Vaiphai khuaah pawh tui a tling hnem hman hle.
Kanan khua hi in 1300 awmin Mizo chenna in hi 800 vel a ni. Mizo veng hi A, B leh C-ah thenin ‘C’ veng hian an tuar nasa ber. Tlang atanga tuilian rawn liamthla chuan mihring chênna in 101 leh biakin 1 a la a, luah ngam lohvin in 203 a awm bawk. Kanan ‘C’-a in luah ngam hi 50 chauh niin Kanan khuaa Mizo Thalai Pawl (MTP) treasurer Zomuanpuia chuan a sawi. He khuaa tuilian tuarte hi Kanan ‘A’ leh ‘B’-a biakin, sikul leh MTP hall-ah te khung khawm an ni a, an khaw kalpawhna lei chu tuilianin a lak vek avangin tanpuina pawh an dawng tlai hle a, an theih ang angin an thawhkhawm a ni. He khua hian tuilian avangin an leilet hmun acre 1000 laia zau chu an chân vek a, an in leh lo sakna atana mau satin August ni 8 khan Zohmun MTP chuan India ram chhungah hnatlang an nei a, an mau sah pum 100 chu lui dungah tawlhthla a ni. Heng khuate bakah hian tuilian avangin Khampat khua pawhin in 30 ngawt an chân a, Falam lamah pawh in a tichhe nual bawk.
Kum 2013-a MSU-in Zofate Inkhawmpui an buatsaihna hmun, Hakha khua pawhin tuilian leh leimin an tuar tuar nasa hle a, in 725 zet luah tlak lohvin a awm a, a chhehvel khaw pahnih ngawt chu luah theih lohvin tuiin a chimpil bawk. He khuaah hian camp 11 siam niin hetah hian a khua leh a chhehvela tuilian tuar chhungkaw 1345, mi 5977 lai chu khung khawm niin, Hakha Rescue Committee Communication Officer Pu Jacob Thang chuan a sawi a ni.
Chin state-a Tedim khua pawhin tuilian leh leimin an tuar nasa hle a, in 109 chu luah tlak lohva chhiain mi 1403 chu chenna tur in leh lo nei lovin an awm mek. In 105 dang pawh luah ngam a nih tawh loh avangin mi 798 lai chu hmun him lama suan chhuah an ni.
“Lei leh kawng a chhiat avangin khaw tam zawkah lirthei a lut thei lo va, harsatna tawkte tanpui tur pawh kein an lut thei chauh a ni. Chuvangin vawiin thleng hian sawrkar leh NGO atangin tanpuina a la lut lo,” tiin The Tedim Post Editor, Pu Thang Van Lian chuan a sawi. Tanpuina awm thei ang ang dapin Zomi Youth Association (ZYA), Tedim chuan theihtawp chhuahin hma a la mek a ni.
___________________
HAKHA TAWRHNA RAMHUAI BAN PHUN VANG!
Hakha khawpuiin chhiatna rapthlak a tawh chhan chu, Chin National Day an hman thinna hmun Vomthu Maung Field-a an Nat Taing (Ramhuai Ban/pillar) phun vang a ni, tiin August ni 5, 2015 khan Hakha mipui 1500 zet chuan sual thupha chawi nan chaw ngheiin tawngtaina an nei a; heta tang hian ruahsur pawh hànin ni chhuak pawh an hmu thei ta niin Hakha Rescue Committee Communication Officer Pu Jacob Thang chuan a sawi.
Chin National Day an hman tumin Myanmar president Thein Sein-a’n tawiawmin Vomthu Maung Field-ah Nat Taing hi a phun a. An history-ah chuan, he Nat Taing phun hian sakhuana lama hmun humhalh leh chhinchhiahna a keng tel a; chu chu Myanmar rama kristian tamna ber, Hakha-ah phun a ni. A hma zawngin Thein Sein hian tiang (staff) a hmang ngai lo va, mahse, hemi tum hian tiang a hmang a, chutah chuan sakhua (dawi) lam thil a tel niin an ring. A tiang hmawra a hawlhna hi chhinchhiahna a ni, an ti bawk. Yangona awm Rev. Dr. Van Ram Uka chuan, kristianna phatsana khawpui chhunga pathian lem betute sakhaw chhinchhiahna an lakluh avangin Hakha khawpui hian Pathian thinurna a chawk tho dawn, tiin a lo sawi tawh niin ZORAM TODAY thulakna chuan a tarlang.
___________________
A THI LO, A TITAU A NI!
Rakhine state-a tuilian avanga tawhsual tawka boral ta, Eetei chu a pasal Pu Mangtea chuan pawm thiam harsa a la ti ngang mai. A ruang zawnga tlawmngaia thawkchhuakte chuan August ni 3, 2015 khan beidawngin an bansan a, a pasal Pu Mangtea erawh chuan a zawn hna a bansan thei lo!
“Ka hmangaih em em Eetei hi a thi lo, a titau mai mai a ni. Hetiang hian a awm fo alawm, a rilru a dam hunah a lo haw leh mai ang,” tia a sawi chuan mite rilru a dek hle a, a rilru dam nan, tlawmngaia a ruang zawngte tin hnuah pawh a thian hnaivaite chuan an la zawnpui chhunzawm zel a ni. Chinland Today-in a tarlan danin, a pasal Mangtea tawrhna thu tam tak hian mite lainat a hlawh phah hle. “Ka tan chuan mittui hi chaw a ni,” a tih te, “A ruang tal hmu ni ila, a thihnaah hian ka thla a muang deuh tur,” a tih te, “Eetei’n, thihnaa ka hlauh ber mai chu tuia thih a ni, a ti a, a hlauh ber anga a thi ta hi tuar thiam har ka ti a ni,” ti tein a tap bang hleithei lo niin Chinland Today chuan a tarlang.
Eetei hi missionary hna thawk a ni a, July ni 28 khan lawnga an chuan laiin tui lianin a la a ni. A ruang hi an hmuh zawh tak loh avangin August ni 5 khan a rawngbawlna hmun, Rakhine state-a Pungnachun khuaah a vuina hun hman a ni. Eetei hian fahrah pathum, sikul naupang chawm lai a nei a, hetia a enkawltu ber a thih takah chuan a fahrah enkawlte pawh an khaw lamah an haw ta niin IPCM missionary Pu Sang Hlei Khup chuan a sawi.