Anthurium festival hi

ZORAM TODAY | October 20-2 November, 2015
Ramchhung  leh ram pawna khualzinmite hipna tur, kutpui huaihawt tura  sawrkar laipuiin Mizoram sawrkar thurawn a pek angin Anthurium Festival leh Thalfavang kut chu kan state sawrkarin Tourism Department kaltlangin a buatsaih thin a; Anthurium Festival phei chu kum sawm lai kan hmang ve ta reng mai a, heng festival kan buatsaih thin hi kan hmang tangkai em, khualzinmite hip luh nan kan hmang tangkai tak meuh em, tih hi a buatsaihtute’n an ngaihtuah a tul viauin a rinawm. Kumin Anthurium Festival, Lengpui Mini Sports Complex-a hman zawh tak kha thlir kir chuan sawrkar laipuiin min rawn beisei dan angin kan hmang lo tih chiang takin a sawi theih. He festival vanga khualzinmi lo zin ta vang vang hmuh tur an awm lo hian he festival hlawhtlin lohzia a tilang.

Tum danga kan hmang leh dawn a nih chuan khualzinmi thahnem tak hip lut thei tura tan lak thar ni se a duhawm hle a, a hmanna tur hmunhma te, a hman dan tur te pawh media kaltlanga vawrh lar ni se, social networking te pawh tangkai taka hman ni tawh se a duhawm hle. Chutiang ni lova tun ang pat pata kal kal zel a nih chuan, cheng nuai 25 hi uiawm takin kan hmang thlawn hiau hiau dawn tihna a ni. Nagaland-a kum tina ‘Hornbill Festival’ an hman thinah khuan kan rama festival huaihawttute hian zir tur an ngah hlein a rinawm.

Sawrkar anga a buatsaihtute’n ruahmanna tha leh felfai, tourism promote duhna rilru tak tak an neih chuan he ram hian khualzinmite hmuh châk a nei tih a chiang a, inbuatsaihna mumal leh changtlung tak nei chunga a neih hun leh ni, a hmun turte pawh chiang fek fawka neih ngheh a tul hle ang. Chuti a nih loh chuan ramdang atanga khualzinmi kan hip luh turte’n kan festival neih hun tur hre chiang lovin kut chhim tura hun insiam lawk an harsat phah thei dawn a, programme hrim hrim pawh a kalphung nghet deuh tak neih a that a rinawm hle bawk.

Kut hlimawm leh hlawtling tak nei thei turin Mizo rilru chu a inpeih a, hnamdang khualzinmite lo hmachhawn pawh he ram hian a cho tih a lang theiin a hriat. Chuvangin, kum dangah chuan a hma aia hma kan sawn zawk theih dan tur te, siamthat ngai siamthat tur te, thil thar chin thar tur te ngaihtuahin sawrkar pawh hian ngaihtuahna seng lehzual sela a duhawm hle ang.