Chhiatna Zofate inpumkhat nan

Kum zabi 18-na hma lam zawnga Mizoram Mizote lo chên tawhna hmun, Myanmar-ah tuilian a nasa hle mai a, “hetianga tuilian hi kan la tawk ngai lo” an ti hial. A nih ngei pawh a rinawm. Zofate chênna ber Chin State chu a tuartu tam ber an ni a, heng mite hi Zofate’n thlang an tlak ruala tla lova châm tlang tate thlah an ni a, a then chu Mizoram buai laia chhova châm tlang tate thlah an ni thung a, heng harsatna tâwkte hi hmanni lawka kan thenawmpa, kan vengpa leh kan khaw pate an ni.
Tu’n kan tawng lo ngai haw lo se, he vanduaina hi a tuartute tan nâ hle mah se, Zofate inunauna min hriat thar lehtirtu a ni tlat. Pawl hrang hrang an che chhuak a, a pawl anga che chhuak hi pawl lian tak tak 10 vel lai an ni a, kohhran leh sumdawng, ram hruaitute leh mimal chenin theihtawp kan chhuah tlâng a ni. Heti khawpa tanpui ngaite tanpui tura Mizoram Mizote thawhchhuahtir theitu chhiatna hi tun hmain a la thleng ngai lo, a tih theih hial ang. Kan tlawmngai pawl lian ber pawh an han che chhuak meuh chu, tun hmaa khawchhak unaute’n an lo hmuh hin dan pawh a thlak ta hlawk mai niin a hriat a, kan inkara daidanna bang awm chu thiahin a awm ta zel a ni. Hlawhtlinna aiin harsatna hi min tipumkhattu a ni zel niin a lang.
Myanmar tuilian tuarte tana pen chhuak hmasa ber Zofa Global Network-in zaithiamte nena Aizawl-a charity concert an neihnaa tel zaithiam pakhat chuan a facebook page-ah inpumkhatna chungchang a ziak a, chu chu Myanmar-a Zofate’n an lo hmuhin an rilru a khawih hle a, an mittui a tla zawih zawih mai a ni, an ti. Hmun hrang hranga awmte hi social media hmanga thlunzawm kan ni tawh a, heta tang hian engtiang chiahin nge inpumkhatna hian Zofate rilru a luah tih pawh hmuh theihin a awm chho ta zel a. Kan thu leh hlaah te, an thu leh hlaah te inpumkhatna chungchangin hmun a luah zau deuh deuh va, a lawmawm hle.
Kan zirlai pawlte leh pawl dang dang pawhin inpumkhatna thu hi thahnemngai takin an tlangaupui thin. Inpumkhatna hi um khata lo thleng nghal thei a ni lo va, zawi zawia rilru lam a insiam hmasak phawt a tha hle. Unau kan nih inhriatna ringawt pawh inpumkhatna pakhat chu a ni sa reng tawh mai. Kan zirlai pawlte’n Zofate inpumkhatna thu an tlangaupui thin hi a thlawn lo a ni tih he chhiat tawhna hian a tarlang chiang hle a ni.