India President-in Governor thar pahnih a ruat

ZORAM TODAY: India President Ram Nath Kovind chuan India Danpui Article 153 angin May ni 25, 2018 (Zirtawpni) khan Mizoram Governor thar tur leh Odisha Governor tur a ruat a; Mizoram Governor thar tur hi Kummanam Rajasekharan niin May ni 28, 2018-a a term tawp tur Lt. Gen. (Retd) Nirbhay Sharma a thlak ang a; Odisha Governor thar tur Prof. Ganeshi Lal chuan March thlaa a term tawp Naga pa S.C. Jamir post ruak, Bihar Governor ni lai Satya Pal Malik-in a hmui tel tak hna a thawk zui dawn a ni.
 

Kummanam Rajasekharan & Prof. Ganeshi Lal

Kummanam Rajasekharan hi Kerala state Bharatiya Janata Party (BJP) President ni lai (2015-2018) a ni a. A political career hi Rashtriya Swayamsevak Sangh (RSS) leh Sangh Parivar activist angin Kerala-ah kum 1970 atangin bul a tan a. Kerala-ah chuan Vishva Hindu Parishad (VHP), Balasadanams, Kshetra Samrakshana Samithi leh Ekal Vidyalayas tana mi tangkai tak a ni.

Politics a luh chilh hmain journalist a ni a, Deepika newspaper-ah sub-editor a ni a, daily newspaper dang Rastravaartha te, Kerala Desam te, Kerala Booshanam leh Kerala Dwani chanchinbuah te a thawk bawk. Kum 1976 khan sawrkar hna thawkin Food Corporation of India-ah a thawk bawk.

Ganeshi Lal hi RSS member a nih hmain Mathematics Professor a ni a, kum 1996-99 chhung khan Haryana Chief Minister Bansi Lal kaihhruai HVP-BJP sawrkarah Minister a ni.  Haryana BJP Unit President a ni tawh a, kum 1996 khan Sirsa Constituency atangin Haryana Legislative Assembly Member atana thlan tlin a ni.