Arunachal tribal-in India Biodiversity Award dawng

ZORAM TODAY:  Arunachal Pradesh-a Bugun hnamte chuan World Biodiversity Day, May ni 22, 2018 khan ‘‘India Biodiversity Award’ lawmman an dawng. He lawmman hi an chenna ngawpuia khawvel hmun danga hmuh tur awm lo, sava chi khat Bugun Liocichla an hu halh that vang nia sawi a ni.

Bugun tribal hnamte hi Arunachal Pradesh-a West Kameng district-a cheng an ni a. Kar tinin mipa naupang 10 hi forest reserve area square km 17 zeta zauvah duty-in an chhuak thin a ni. Chung mite chu Tamil Nadu Police-a Special Task Force -te chuan training pein, an tualchhung thalaite chu chung ramngaw humhalh turin an inpe a, sawrkar leh mipui tangkawpin forest humhalhna an kalpui hi hmun dangah hriat tur a la tam lo hle niin kan thu lakna chuan a tarlang.  

Arunachal Pradesh-a ramngaw tam zawk hi chu hnam tenau hrang hrangte chenna hmun niin state sawrkar pawhin a humhalh tlat a ni a. Nikum, 2017 January thla khan Singchung khuaa Bugun mipuite leh Forest Department tangkawp chuan, square kilometre 17 zeta zau enkawla humhalhna tur Singchung Bugun Village Community Reserve (SBVCR) an din a. Tichuan, tun kar thawhlehni May ni 22, 2018 khan India Biodiversity Award 2018 category hrang hrang an siamah ‘Conservation of Wildlife Species’ category-ah award an la ta a ni. He award hi National Biodiversity Authority (NBA) te pek a ni a, Union Ministry of Environment, Forest & Climate Change leh United Nations Development Programme tangkawpin Hyderabad-ah he hun hi an buatsaih a ni.


He reserve area hi Wildlife (Protection) Act, 1972 angin state sawrkar chuan mipuite enkawl atan ‘community reserve’-ah a puang a. A enkawl leh humhalhna hi tualchhung mite’n an thawk a ni. He hmun hi khawvela sava vang tak Bugun Liocichla chenna hmun a ni a, hmun danga a awm hriat a la ni lo. Kum 1996 khan sava chanchin chhui mi Dr. Ramana Athreya, Indian Institute of Science Education and Research, Pune chuan he sava hi hmuin species thar hlak a ni tih 2006 khan finfiah a ni a, kum 1947-a India rama sava chi thar (new species) an hmuh chhuah hnua an hmuh chhuah thar leh hmasak ber a ni bawk.
 

Buhun Liocichla

Rupa Forest Division-a District Forest Officer (DFO) Millo Tassar chuan, “He sava hi Bugun hnamin a humhalh nana theihtawp an chhuah avangin Buhun Liocichla tia a hming vuah a ni a, tunah hian 20-24 vel an awm mek a ni,” a ti.