AADHAAR CARD CHUNGCHANGAH MSU CHE CHHUAK

11.8.2016: Vawiin chawhnu dar 2:00 khan MSU hruaitute chuan Higher & Technical Education Minister Pu R. Romawia chu Aadhaar card chungchangah an kawm a. Mizo zirlai zingah aadhaar card nei lo tam tak an la awm laia scholarship dilnaa aadhaar card mandatory a nih chungchangah, Mizo zirlaite’n hriatthiamna (exemption) kan neih theih nan chak taka hma la turin Minister hi an ngen.

MSU President P.C. Lalrinhlua hova vawiina Minister hmuhnaah hian MSU hruaitute chuan, sawrkar laipuiin Mizo zirlaite exemption min pe thei lo a nih pawha, aadhaar card siamtu company-te’n aadhaar card siam hna an thawh țan leh hunah zirlaite chu ngai pawimawh bik turin an ngen bawk.

Minister hian MSU ngenna bawhzui a tum thu a sawi a, Mizoramin aadhaar card-a exemption kan neih theih nan sawrkar laipuiah ziaka a lo thlen nghal tur thu a sawi bawk.

Naktuka New Delhi-a Ministry of Minority meeting neih turah naktuka Mizoram Scholarship Board hotute chuan Mizo zirlaite tan aadhaar card exemption hi an dil nawn leh dawn a, August thla chhunga scholarship dil theih pawh a hun pawt sei turin an ngên dawn bawk a ni.

Naktuka Delhi meeting-a kalte thu leh hla azirin MSU chuan theihtawp chhuahin hma a la zel dawn a ni. Zirlaite zingah aadhaar card nei lo kan tam a, phaia awmte tan pawh a buaithlak viau. MSU a chet dawn avangin aadhaar card nei lo zirlaite pawh beidawng lo ila, MSU hmalakna i ngaichang ang u.