India-in khawmpui pawimawh thleng dawn

ZORAM TODAY | March 1-14, 2016

India chuan April ni 12, 2016 atanga neih tan tur Asia Ministerial Conference on Tiger Conservation vawi thumna chu a thleng dawn. He inkhawmpui hi sakei humhalhna lam hawi a ni a, Prime Minister Narendra Modi-in a hawng ang.

He inkhawmpuiah hian Asia rama sakei tamna ram 13 Bangladesh, Bhutan, Cambodia, China, India, Indonesia, Lao PDR, Malaysia, Myanmar, Nepal, Russia, Thailand, leh Vietnam te an tel dawn a ni.

He inkhawmpuia ram hrang hrang kalkhawmte hian sakei an humhalh dan te, sakei humhalhna kawnga thil pawimawh tak takte an inhrilh tawn dawn a, khawvel pum huapa tangruala sakei humhalh dan tur te pawh an sawiho rin a ni.

Asia Ministerial Conference on Tiger Conservation hmasa ber hi kum 2010  khan Hua Hin, Thailand-ah neih a lo ni tawh a, a vawi hnihna hi Thimphu, Bhutan-ah 2013 khan neih a lo ni tawh bawk.

India ramah hian khawvel puma sakei 70% a awm a, kum 2014-a sakei chhiarpui neihah khan India ramah sakei 2,226 zet a awm. Karnataka-ah awm tam berin 406 a awm a, Uttarakhand-ah 340 awmin a dawt a, Madhya Pradesh (308), Tamil Nadu (229), Maharashtra (190), Assam (167), Kerala (136) leh Uttar Pradesh (117) te’n a dawt a ni.